जेन्जी आन्दोलनपछि राष्ट्रिय स्वतन्त्र पार्टी (रास्वपा) भित्र पनि नेतृत्व परिवर्तनको माग बढ्दै गएको छ ।
केन्द्रीय सदस्य तोसिमा कार्कीले नेतृत्वमा सुधार र पुनर्गठनको आवश्यकता औंल्याउँदै सचिवालय बैठकमा बस्न अस्वीकार गरेकी छन् ।
कार्यवाहक सभापति डोलप्रसाद अर्यालले विघटित प्रतिनिधिसभाका पाँच पूर्वसांसद शिशिर खनाल, सोविता गौतम, हरि ढकाल, गणेश पराजुली र तोसिमा कार्कीलाई सचिवालयमा समेट्ने निर्णय गरेपछि विवाद सुरु भएको हो ।
रवि लामिछाने जेलमा रहेकाले अर्यालले पार्टी हाँकिरहेका छन् ।
कार्कीले सचिवालय विस्तारलाई अस्वीकार गर्दै भनिन्, ‘हामीले खोजेको पुनर्गठन हो, कार्यकारी नेतृत्व परिवर्तन होइन ।’
उनको असहमतिपछि नाम हटाइयो ।
हालै सहमहामन्त्री सुमना श्रेष्ठले पनि पार्टी छोडेकी थिइन् ।
फेरि कार्कीको असन्तुष्टिले रास्वपामा पुनः हलचल ल्याएको छ ।
प्रवक्ता मनीष झा र सहमहामन्त्री विपिन आचार्यले सचिवालय विस्तार सभापतिको अधिकारभित्र भएको बताउँदै कार्कीको व्यवहार अपरिपक्व भएको टिप्पणी गरेका छन् ।
उनीहरूको भनाइमा फरकमत राख्ने अधिकार सबैलाई भए पनि पार्टीको निर्णयलाई रोक्न नमिल्ने प्रावधान छ ।
तर, कार्की नेतृत्वमा पुरानै दलको सोच हावी भएको आरोप लगाउँदै भन्छिन्, ‘हामी थप लोकतान्त्रिक हुनुपर्छ, नेतृत्वको कार्यशैली सुधार्नुपर्छ ।’
रास्वपाले आगामी कात्तिक २१–२२ गते चितवनमा केन्द्रीय विस्तारित बैठक बोलाएको छ ।
जसमा फागुन २१ गतेको निर्वाचन र महाधिवेशनको मिति पुनः तय गरिनेछ ।
जेन्जी आन्दोलनपछि नयाँ राजनीतिक समीकरण बनिरहेका बेला रास्वपा भित्रको यो विवादले पार्टीको दिशा अनिश्चित बनाएको छ ।























