काठमाडौं– नेकपा (एमाले)को केन्द्रीय कमिटी बैठकमा नेतृत्व परिवर्तनको एजेण्डा प्रमुख विषय बनेको छ ।
यद्यपि अध्यक्ष केपी शर्मा ओलीले २७–२९ मंसिरमा एघारौँ महाधिवेशन गर्ने प्रस्ताव गरेपछि तत्काल राजीनामाको माग कमजोर भएको छ ।
स्रोतका अनुसार २४ असोजमा उपाध्यक्षहरू ईश्वर पोखरेल, युवराज ज्ञवाली, अष्टलक्ष्मी शाक्य, रामबहादुर थापा ‘बादल’, विष्णु पौडेल र सुरेन्द्र पाण्डेसहित अधिकांश पदाधिकारीले ओलीलाई नेतृत्व मार्ग प्रशस्त गर्न आग्रह गरेका थिए ।
सचिवालय बैठकमा सचिव योगेश भट्टराईले ओलीको राजीनामा माग्दै शंकर पोखरेललाई नयाँ अध्यक्षका रूपमा अगाडि सार्ने प्रस्ताव गरेपछि ओली आक्रोशित भएका थिए ।
ओलीले उद्घाटन मन्तव्यमा आफूले नेतृत्व छोड्न नपर्ने तर्क गर्दै फेसबुकमा लेखेर वा अन्तर्वार्ता दिएर राजीनामा गरिँदैन भन्ने अडान लिएका थिए ।
महासचिव पोखरेलले सचिवहरूलाई राजीनामाको प्रस्ताव तत्काल नथप्न आग्रह गरे पनि भट्टराई र गोकर्ण विष्टले सचिवालयमा लामो आलोचना गरेका थिए ।
योगेशले ओलीसँगको पुरानो सम्बन्ध सम्झिँदै पनि अब नयाँ पुस्ताले नेतृत्व लिनुपर्ने बताएका थिए ।
ओलीले भट्टराईको प्रसंग उठाउँदै तीव्र प्रतिक्रिया दिएपछि बैठकमा नेताहरूबीच वाकयुद्ध चलेको थियो ।
पदाधिकारीहरू भने अझै पनि नेतृत्व परिवर्तनको पक्षमा कायम छन् ।
महासचिव पोखरेलको प्रस्तावअनुसार बैठकमा केन्द्रीय सदस्यहरूले उल्टो वर्णानुक्रममा धारणा राखिरहेका छन् ।
धेरै सदस्यहरूले लिखित प्रस्ताव पेस गरेका छन् भने ओलीको प्रस्ताव ६ पृष्ठको मात्र रहेको छ ।























