images
images
  • जेन्जी आन्दोलनको आक्रमणमा परेका देउवा अझै भूमिगत, फोन संवाद बाहेक भेटवार्ता बन्द

    काठमाडौं– जेन्जी पुस्ताको आन्दोलनपछि सत्ताबाट बाहिरिएको नेपाली कांग्रेसको केन्द्रीय समिति बैठक नजिकिँदै गर्दा पार्टी नेतृत्वबारे आन्तरिक छलफल तीव्र बनेको छ ।

    असोज २६ देखि हुने बैठकमा अबको नेतृत्व र त्यसका लागि प्रक्रिया तय गर्ने मुख्य एजेन्डा बन्ने देखिन्छ ।

    भदौ २३–२४ मा जेन्जी आन्दोलनका क्रममा सभापति शेरबहादुर देउवा र पत्नी आरजु राणा देउवामाथि कुटपिट भएको थियो ।

    देउवाको टाउकोमा १२ टाँका लगाइएको थियो, अहिले स्वास्थ्यलाभ गरिरहेका छन् ।

    सुधारोन्मुख देउवाले फोनमार्फत पार्टी नेताहरूसँग सम्पर्क राखेका छन् र चाँडै भेटघाट गर्ने तयारीमा छन् ।

    देउवाको चार वर्षे कार्यकाल मंसिरमा सकिँदैछ ।

    कांग्रेस विधान अनुसार उनले तेस्रो पटक सभापति बन्न पाउँदैनन् ।

    यस कारण अबको नेतृत्व परिवर्तनबारे चार विकल्पमा छलफल हुँदैछ ।

    (१) नियमित महाधिवेशन, (२) विशेष महाधिवेशन, (३) कार्यवाहक सभापति तोक्ने, र (४) हालको केन्द्रीय समिति विघटन गरी संयोजक तोक्ने ।

    नियमित महाधिवेशनको तयारीका लागि क्रियाशील सदस्यता नवीकरण असोज मसान्तसम्मको म्यादमा चलिरहेको छ ।

    तर, धेरै नेताहरू विशेष महाधिवेशनका पक्षमा छन् ।

    १४औं महाधिवेशनका ४० प्रतिशतभन्दा बढी प्रतिनिधिले हस्ताक्षर गरेमा सभापतिले तीन महिनाभित्र विशेष महाधिवेशन बोलाउनुपर्ने प्रावधान छ ।

    गगन थापा, विश्वप्रकाश शर्मा र शेखर कोइराला समूहले विशेष महाधिवेशन माग गर्दै प्रतिनिधिहरूको हस्ताक्षर संकलन थालेका छन् ।

    उनीहरू यसलाई ५० प्रतिशतभन्दा बढी पुर्‍याउने दाबी गर्छन् ।

    देउवा पक्ष भने नियमित महाधिवेशनमै जाने र पार्टी एकता कायम राख्ने धारमा छ ।

    केन्द्रीय सदस्यहरूका अनुसार सभापति देउवाले अहिलेसम्म गगन, विश्वप्रकाश र शेखरसँग भेटघाट नगरेका भए पनि बैठकअघि संवाद हुने अपेक्षा छ ।

    देउवा पक्षका केही नेताहरूले आवश्यक परे उपसभापति पूर्णबहादुर खड्कालाई कार्यवाहक सभापति तोकेर पार्टी अगाडि बढाउने विकल्प पनि चर्चा गरेको बताए ।

    संस्थापनइतर नेताहरूले भने देउवा, आरजु र अन्य वरिष्ठ नेताहरूले अब कुलिङ पिरियड लिएर नयाँ पुस्तालाई अवसर दिनुपर्ने आवाज उठाएका छन् ।

    उनीहरूका अनुसार जेनजी आन्दोलनले पार्टीभित्र रूपान्तरणको मागलाई तीव्र बनाएको छ ।

    यदि असोज २६ को बैठकले स्पष्ट निर्णय नलिए, त्यसकै बीचमा ४० प्रतिशतभन्दा बढी प्रतिनिधिको हस्ताक्षर बुझाइएपछि देउवालाई पुसभित्र विशेष महाधिवेशन बोलाउनुपर्ने बाध्यता हुनेछ ।

    विशेष महाधिवेशन भएमा २०७८ मंसिरको १४औं महाधिवेशनका ४७४३ प्रतिनिधिले नै मतदान गर्नेछन् ।

    फागुन २१ मा तय गरिएको प्रतिनिधि सभा चुनावअघि कांग्रेसले नेतृत्व र नीति दुवैमा नयाँ रूपान्तरण गर्ने तयारीमा रहेको देखिन्छ ।

    प्रतिक्रिया दिनुहोस्
    images
    images