images
images
  • इलाममा भीषण वर्षा : पहिरोमा पुरिएर एकै घरका ६ जनासहित १८ को मृत्यु

    इलाम– अविरल वर्षापछि आएको बाढी र पहिरोले इलामका विभिन्न स्थानमा ठूलो जनधनको क्षति पु¥याएको छ ।

    जिल्ला प्रहरी कार्यालयका अनुसार इलामका कम्तीमा छ स्थानमा पहिरो र बाढीका घटनामा परी १८ जनाको मृत्यु भएको छ ।

    सुर्योदय नगरपालिका–१ मानेभञ्ज्याङका डम्बरबहादुर तामाङको घर माथिबाट आएको पहिरोले पुरिँदा घरभित्र रहेका छ जनाको मृत्यु भएको प्रहरीले जनाएको छ ।

    त्यस्तै, सोही नगरपालिका–१ मा राजु क्षेत्रीको घरमा पहिरो खस्दा चार जनाको शव फेला पारिएको र उपचारका लागि लैजाँदै गर्दा थप एक जनाको बाटोमै मृत्यु भएको सशस्त्र प्रहरी बलका सूचना अधिकारी डिएसपी शैलेन्द्र थापाले जानकारी दिए ।

    सन्दकपुर गाउँपालिका–१, छाँगेमा पहिरोले एक जनाको ज्यान लिएको छ भने अर्को एक जना घाइते भएका छन् ।

    माइजोगमाई गाउँपालिका–६, प्याङमा भने एकै घरका पाँच जना बेपत्ता भएको डिएसपी थापाले बताए ।

    त्यस्तै, सन्दकपुर गाउँपालिका–३, सुलुबुङमा एक बालिका घरसहित बेपत्ता भएकी छन् ।

    माङ्सेबुङ गाउँपालिकामा पहिरोका कारण एक गर्भवती महिला र एक पुरुष गम्भीर घाइते भएका छन् ।

    देउमाई नगरपालिका–५ धारेमा एक जनाको मृत्यु भएको छ भने सोही नगरपालिका–५ धुसुनेमा दुई जनाले ज्यान गुमाएका छन् ।

    फाकफोकथुम गाउँपालिका–३ रातमाटेमा पनि एक जनाको मृत्यु भएको छ ।

    इलाम नगरपालिका–५ घोसगाउँमा पहिरोले एकैपटक छ जनाको ज्यान गएको प्रहरीले पुष्टि गरेको छ।

    स्थानीय प्रशासनका अनुसार बेपत्ता र घाइतेहरूको खोजी तथा उद्धार कार्य निरन्तर जारी छ।

    प्रतिक्रिया दिनुहोस्
    images
    images