काठमाडौं- त्रिभुवन विश्वविद्यालयका सहप्राध्यापक तथा मौसमविद् डा. विनोद पोखरेलले यस वर्ष पनि गत वर्षजस्तै असोजमा ‘भीषण’ वर्षा हुने उच्च सम्भावना रहेको बताएका छन् ।
उनका अनुसार भोलिदेखि हल्का–मध्यम वर्षा सुरु भई असोज १६ रातिदेखि पूर्वी नेपालमा भारी वर्षा बढ्ने देखिन्छ ।
विशेषगरी असोज १७–२१ बीच तीनै मोडेलले निरन्तर भारी वर्षाको संकेत गरेको उनले स्पष्ट पारेका छन् ।
“फोरकास्ट नमिलोस् भन्ने कामना गरौँ तर, पोहोरजस्तै परिस्थिती आउन सक्ने संकेत देखिएको छ,” पोखरेलले सामाजिक सञ्जालमा लेखेका छन् ।
उनीसँगै जलवायुविज्ञ डा. धर्मराज उप्रेतीले पनि असोज १७ देखि पूर्वी नेपालतिर भारी वर्षा गराउने प्रणाली विकसित भइरहेको बताए ।
मौसम पूर्वानुमान महाशाखाका अनुसार–
१० मि.मि.सम्म : हल्का वर्षा
१०–५० मि.मि. : मध्यम वर्षा
५०–१०० मि.मि. : भारी वर्षा
१००–२०० मि.मि. : धेरै भारी वर्षा
२०० मि.मि.भन्दा बढी : अति भारी वर्षा मानिन्छ ।
गत वर्ष असोज १०–१३ मा ‘रेकर्ड ब्रेक’ पानी पर्दा काठमाडौंसहित धेरै स्थानमा बाढी–पहिरोको ठूलो क्षति भएको थियो ।























