काठमाडौं– नेकपा (माओवादी केन्द्र) र एकीकृत समाजवादीबीच पार्टी एकताको गृहकार्य सुरु भएको छ ।
आगामी आम निर्वाचनलाई लक्ष्य गर्दै दुवै दलले आफ्नो राजनीतिक विरासत जोगाउन एकताका लागि छलफल अघि बढाएका हुन् ।
अध्यक्ष पुष्पकमल दाहाल ‘प्रचण्ड’ र अध्यक्ष माधवकुमार नेपालबीच पछिल्ला महिना ६ पटकभन्दा बढी वार्ता भइसकेको छ ।
प्रदेश इन्चार्जहरूसँगको बैठकमा पनि विचार र नीति मिल्ने निष्कर्ष निकालिएको छ ।
माओवादी उपमहासचिव वर्षमान पुनका अनुसार, बदलिँदो परिस्थितिमा वाम एकता आवश्यक भएकाले महाधिवेशनसँगै पार्टी एकताको प्रक्रिया अघि बढाइनेछ ।
तर, एकीकृत समाजवादीभित्र झलनाथ खनाललगायत केही नेताले असहमति जनाए पनि अध्यक्ष नेपालको जोडबलमा केन्द्रीय सचिवालय बैठकले नीति र विचार मिल्ने वामपन्थी दलसँग एकता गर्ने निर्णय गरिसकेको छ ।
वरिष्ठ नेता बेदुराम भुसालले सांगठनिक संरचना र नाम–चिह्नबारे भने अझै छलफल गर्नुपर्ने बताए ।
दुवै दलबीच शीर्ष नेताहरूलाई सम्मानजनक पद दिने र साझा संरचना बनाउनेबारे पनि प्रारम्भिक सहमति भएको छ ।
साथै, संसद् पुनःस्थापनाको माग छाडेर प्रत्यक्ष चुनावी तयारीतर्फ जाने निष्कर्ष निकालिएको छ ।
हाल एकीकृत समाजवादीका धेरै कार्यकर्ता पुनः एमालेतर्फ फर्किरहेको अवस्थामा, पार्टी जोगाउन माओवादीसँग एकता ‘बाध्यता’ बनेको नेताहरू बताउँछन् ।
माओवादीले पनि नेत्रविक्रम चन्द नेतृत्वको नेकपा तथा अन्य समाजवादी शक्तिसँग सहकार्य गर्ने निर्णय गरिसकेको छ ।
‘समाजवादी मोर्चा’मार्फत दुवै दलले सहकार्य गर्दै आएका छन् ।
प्रतिनिधिसभा विघटनअघि माओवादीसँग ३२ र समाजवादीसँग १० सिट थियो ।
अब आगामी २१ फागुनमा हुने निर्वाचनअघि नै एकता टुंग्याउने अध्यक्ष नेपालको इच्छा छ ।
तर, पतञ्जली जग्गा प्रकरणमा मुद्दा खेपिरहेका नेपाल आन्तरिक दबाबमा छन् ।
त्यसबाट पार पाउन र राजनीतिक पकड कायम राख्न पनि उनी माओवादीसँग एकता गर्न उत्सुक रहेको समाजवादीभित्रको धारणा छ ।























