विश्व खबर 
काठमाडौं– इजरायलले गाजामा सैन्य कारबाही तीव्र बनाएसँगै हमासको सशस्त्र शाखा अल–कस्साम ब्रिगेडले शनिबार ४८ जना बन्दीको सामूहिक फोटो ‘बिदाइ तस्बिर’ भन्दै सार्वजनिक गरेको छ ।
अलजजिरा र इजरायली सञ्चारमाध्यमले प्रकाशित उक्त तस्बिरमा ०८० असोज २३ देखि हमासको कब्जामा रहेका नेपाली नागरिक विपिन जोशी पनि देखिएका छन् ।
फोटोलाई सबैको नाममा ‘रोन अराड’ लेखिएको छ, जो १९८६ मा बेपत्ता भएका एक इजरायली वायुसेना अधिकृतसँग जोडिएको नाम हो ।
हमासले यसअघि आक्रमण बढे बन्दीको जीवन संकटमा पर्न सक्ने चेतावनी दिएको थियो ।
नेपाली राजदूत धनप्रसाद पण्डितले भने यसबारे कुनै आधिकारिक जानकारी नभएको बताए ।
विपिनको परिवारले समेत राजदूतलाई सोधखोज गरेका थिए ।
इजरायली अधिकारीहरूले बिदाइ तस्बिरलाई हमासको दबाब सिर्जना गर्ने प्रयासका रूपमा लिएका छन् ।
इजरायली अनुमान अनुसार हाल हमासको कब्जामा रहेका ५० मध्ये करिब २० जना मात्र जीवित छन् ।
०८० असोज २३ मा हमासले २५१ जनालाई अपहरण गरेको थियो। विभिन्न युद्धविराम अवधिमा केही दर्जन बन्दी मुक्त भए पनि नेपाली नागरिक विपिन जोशीको अवस्था अझै अज्ञात छ ।
