विश्व खबर 
काठमाडौं– जेन्जी आन्दोलनले सरकार ढाल्दा कांग्रेस, एमाले, माओवादी र एकीकृत समाजवादीमा नेतृत्व हस्तान्तरण र पुस्तान्तरणको बहस सुरु भएको छ ।
दोस्रो र तेस्रो तहका नेताहरू खुलेर माग अघि सारेका छन्, तर शीर्ष नेताहरू भने मौन छन् ।
कांग्रेस सभापति देउवा अस्पतालमा छन् भने एमाले अध्यक्ष ओली, माओवादी अध्यक्ष प्रचण्ड र एकीकृत समाजवादी अध्यक्ष नेपाल अझै सुरक्षा मातहत छन् ।
युवा पुस्ताले शीर्ष नेतृत्वको असफलताप्रति आक्रोश देखाएपछि दोस्रो तहका नेताहरूले पुनर्गठनको माग गर्दै खुलेर बोल्न थालेका हुन् ।
कांग्रेस नेता शेखर कोइरालाले नेतृत्व, संगठन र विचारमा नयाँपन ल्याउनुपर्ने बताएका छन् ।
महामन्त्री गगन थापा र विश्वप्रकाश शर्माले पनि नेतृत्व फेर्नुपर्ने सन्देश दिएका छन् ।
शर्माले सभापति देउवा, ओली र प्रचण्डले राजनीतिबाट अवकाश लिनुपर्ने बताए ।
एमालेमा पनि ओलीले नेतृत्व छोड्नुपर्ने मत बढ्दै छ ।
उपाध्यक्ष सुरेन्द्र पाण्डे, सचिव गोकर्ण विष्ट, योगेश भट्टराई लगायतका नेताहरूले पार्टी पुनर्गठन आवश्यक रहेको बताएका छन् ।
सचिव भट्टराईले युवामुखी, जनमुखी र प्रगतिशील नेतृत्व आवश्यक भएको औँल्याए ।
स्थायी समिति सदस्य बिन्दा पाण्डे र पोलिटब्युरो सदस्य गोकुल बाँस्कोटाले पनि नेतृत्व र कार्यशैलीमा पुनर्गठनको आवश्यकता औँल्याएका छन् ।
माओवादीमा उपमहासचिव जनार्दन शर्माले पुनर्गठन र पुस्तान्तरणको माग गर्दै आएका छन् ।
एकीकृत समाजवादीका महासचिव घनश्याम भुसालले नेतृत्व पुस्तान्तरण र वाम एकता आवश्यक रहेको बताएका छन् ।
जेन्जी आन्दोलनपछि दलहरूमा नयाँ नेतृत्व र संरचनात्मक सुधारको आवाज तेज भएको यो बहसले आगामी राजनीतिक परिदृश्यमा महत्वपूर्ण भूमिका खेल्ने देखिन्छ ।
प्रतिक्रिया दिनुहोस्