विश्व खबर 
काठमाडौं– प्रधानमन्त्री केपी शर्मा ओली नेतृत्वको सरकारमा सहभागी मन्त्रीहरूले पार्टीको निर्देशन नटेरेपछि दुई मधेशवादी दल सरकारबाट बाहिरिने तयारीमा छन् ।
अशोक राई नेतृत्वको जनता समाजवादी पार्टी (जसपा) र महन्थ ठाकुर नेतृत्वको लोकतान्त्रिक समाजवादी पार्टी नेपाल (लोसपा)ले समर्थन कायम राख्दै सरकारबाट बाहिरिने निर्णय गरेका हुन् ।
जसपाले आफ्ना मन्त्री नवलकिशोर साह (महिला, बालबालिका तथा ज्येष्ठ नागरिक) र प्रदीप यादव (खानेपानी)लाई फिर्ता बोलाउने र सांसद डा.वीरेन्द्र महतो र रञ्जु झालाई मन्त्री बनाउन ८ भदौमा सिफारिस गरेको थियो ।
तर, ११ भदौसम्म राजीनामा गर्न भनिए पनि दुवै मन्त्रीले मान्न अस्वीकार गरेपछि जसपा बाहिरिने निष्कर्षमा पुगेको हो ।
यस्तै, लोसपाले श्रम, रोजगार तथा समाजिक सुरक्षामन्त्री शरतसिंह भण्डारीलाई फिर्ता बोलाएर सर्वेन्द्रनाथ शुक्लालाई पठाउने तयारी गरेको छ ।
तर, महिनौँदेखि अध्यक्ष ठाकुरले आग्रह गर्दा पनि प्रधानमन्त्री ओलीले निर्णय नगरेको लोसपा नेताहरूको आरोप छ ।
हाल ओली नेतृत्वको सरकारमा नेपाली कांग्रेस, नेकपा (एमाले), जसपा, जनमत पार्टी, नागरिक उन्मुक्ति पार्टी र लोसपा सहभागी छन् ।
जनमतले संघीय सरकारले होइन, मधेश प्रदेश सरकार नेतृत्व गरिरहेको छ ।
यसअघि उपेन्द्र यादव नेतृत्वको जसपाले सरकारलाई दिएको समर्थन फिर्ता गरिसकेको छ ।
प्रतिक्रिया दिनुहोस्