विश्व खबर 
काठमाडौं– प्रधानमन्त्री केपी शर्मा ओली आज दिउँसो १ बजे प्रतिनिधिसभा बैठकमा सम्बोधन गर्दैछन् ।
चीन भ्रमणमा प्रस्थान गर्नुअघि उनले आसन्न चीन तथा भारत भ्रमणबारे जानकारी दिने अपेक्षा गरिएको छ ।
ओली शनिबार चिनियाँ राष्ट्रपति सी चिनफिङको निमन्त्रणामा नेपाली प्रतिनिधिमण्डलको नेतृत्व गर्दै साङ्घाई सहयोग संगठन (एससीओ) शिखर सम्मेलनमा सहभागी हुन चीन जाने कार्यक्रम छ ।
त्यसपछि उनी भारत भ्रमणमा पनि प्रस्थान गर्नेछन् ।
तर, प्रधानमन्त्रीको सम्बोधनलाई राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) ले बहिष्कार गर्ने घोषणा गरेका छन् ।
भिजिट भिसा दुरुपयोग प्रकरणमा गृहमन्त्रीको राजीनामा माग गर्दै दुवै दलले लामो समयदेखि संसद् अवरोध गर्दै आएका छन् ।
रास्वपाका प्रवक्ता मनिष झाले अवरोध कायम रहने बताउँदै प्रधानमन्त्रीको सम्बोधन सुन्ने समाचारहरू असत्य भएको स्पष्ट पारे ।
पार्टीका सांसद गणेश पराजुलीले सम्बोधन सुरु हुनासाथ बाहिरिने तयारी भएको बताए ।
यस्तै, राप्रपाका उपाध्यक्ष ध्रुवबहादुर प्रधानले पनि बहिष्कार निरन्तर रहने जानकारी दिए ।
प्रमुख प्रतिपक्षी दलका नेता एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ उपस्थित नहुने माओवादी संसदीय दलको स्रोत बताएको छ ।
पार्टीको कार्यक्रको व्यवस्तताका कारण प्रचण्ड संसद्मा उपस्थित नहुने स्रोत बताउँछ ।
प्रतिक्रिया दिनुहोस्