काठमाडौं– राष्ट्रिय स्वतन्त्र पार्टी (रास्वपा)ले रूपन्देही–३ मा बिहीबारदेखि उम्मेदवार छान्न ‘प्राइमरी इलेक्सन’ सुरु गरेको छ ।
साधारणतया प्राथमिक निर्वाचन भनेको दलका स्थानीय सदस्यहरूले प्रत्यक्ष मतद्वारा उम्मेदवार चयन गर्ने प्रक्रिया हो ।
तर, रास्वपामा यसपटक पनि अन्तिम निर्णय ‘माथिका नेताहरू’ गर्ने प्रावधान राखिएको छ ।
कात्तिक १७ मा हुने उपनिर्वाचनका लागि अहिले ९ जना उम्मेदवार प्रतिस्पर्धामा छन् ।
सुलभ खरेल, पार्थिवेन्द्र उपाध्यक्ष, डा. लेखजङ्ग थापा, ज्ञानु पौड्याल, जितबहादुर गुप्ता, कुसुम महर्जन, रचना क्षेत्री, पुनमकुमारी अग्रवाल र मधुप्रसाद अर्याल प्रतिस्पर्धी हुन् ।
पार्टीले नो भोट विकल्प समेत राखेको छ ।
जसले मतदातालाई कुनै पनि उम्मेदवार मन नपरेमा मतदान नगर्न अनुमति दिन्छ ।
उम्मेदवार छनोटमा मतभार यसरी विभाजन गरिएको छ :
क्षेत्रीय सदस्यहरूको मत ४० प्रतिशत
स्थानीय नेताहरूको मत ५ प्रतिशत
केन्द्रका नेताहरूको मत ५५ प्रतिशत (केन्द्रीय सदस्य ५ प्रतिशत, सचिवालय–निर्दिष्ट नेताहरू ५० प्रतिशत)
उम्मेदवारको प्रस्तुती, योजना, पेशागत अनुभव, नेतृत्व क्षमता, नैतिकता र पार्टी मूल्य–मान्यताको आधारमा नेताहरूले मतदान गर्नेछन् ।
समावेशीताअन्तर्गत महिला, दलित, आदिवासी, थारू, मुस्लिम, मधेसी, पछाडि पारिएका क्षेत्र र अपांगता भएका उम्मेदवारले ५ प्रतिशत अतिरिक्त मत पाउनेछन् ।
रास्वपाका प्रवक्ता मनिष झाका अनुसार पार्टीको लिडरसिप एकेडेमी अहिले अभ्यासमा नभएकाले सदस्यहरूको मतभार सीमित गरिएको हो ।
भविष्यमा लिडरसिप एकेडेमी सुरु भएपछि स्थानीय सदस्यहरूको मतभार ८५ प्रतिशत हुनेछन् ।























