काठमाडौं– नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ सोमबार ललितपुरको हरिसिद्धि पुगेर नेपाल कम्युनिस्ट पार्टीका अध्यक्ष नेत्रविक्रम चन्द ‘विप्लव’सँग भेटे ।
दुवै नेताबीच पछिल्ला राजनीतिक घटनाक्रम र पार्टी एकताबारे कुराकानी भएको छ ।
०७१ सालमा माओवादी केन्द्रबाट अलग भएका विप्लवले छुट्टै समूह बनाए पनि पछिल्ला वर्षयता प्रचण्डसँग निरन्तर संवाद भइरहेको छ ।
असार ७ गते खुमलटारमा भएको भेटमा पनि समाजवादी मोर्चा सक्रिय गर्ने र सम्भावित एकता बारे छलफल भएको थियो ।
तर, नेकपा (विप्लव)का प्रवक्ता खड्गबहादुर विश्वकर्मा ‘प्रकाण्ड’का अनुसार एकता सजिलो छैन ।
उनका भनाइमा, ‘राजनीति र विचार सबै मिल्नुपर्छ, अहिले दुवै दल छुट्टै तवरले जनतामाझ छन्, सम्भावना नभएको होइन, अझै खोजी गर्नुपर्छ ।’
विप्लव समूह विगतमा हिंसात्मक गतिविधिमा संलग्न भए पनि हाल शान्तिपूर्ण राजनीतिमा आएको दाबी गर्छ ।
२०७८ सालमा तत्कालीन प्रधानमन्त्री केपी शर्मा ओलीसँगको तीनबुँदे सम्झौतापछि संविधानको दायरामा रहने र हिंसा त्याग्ने प्रतिबद्धता जनाएको थियो ।
तर समूह अझै चुनावी प्रतिस्पर्धामा उत्रिएको छैन ।
माओवादी केन्द्रले भने एकतालाई सहज रूपमा लिएको छ ।
प्रचण्ड सचिवालयका सदस्य गोविन्द आचार्यले सोमबारको भेट एकतामै केन्द्रित रहेको बताए ।
दुवै दल माओवादी आन्दोलनकै पृष्ठभूमिबाट आएका भए पनि अहिले दर्शन, रणनीति र संगठनात्मक अभ्यासमा भिन्न छन् ।
दुवै पार्टी समाजवादी मोर्चामा आबद्ध छन् र माओवादी केन्द्रले मोर्चामा रहेका अन्य दलसँग पनि एकताको प्रयास गरिरहेको छ ।























