काठमाडौं– प्रधानमन्त्री एवं नेकपा (एमाले) अध्यक्ष केपी शर्मा ओलीले पूर्वप्रधानमन्त्री तथा एकीकृत समाजवादी पार्टी अध्यक्ष माधव नेपालविरुद्ध दायर गरेको रिट चार वर्षदेखि सर्वोच्च अदालतमा अल्झिएको छ ।
मंगलबार न्यायाधीश नहकुल सुवेदी र नित्यनन्द पाण्डेयको इजलासमा पेसी तोकिए पनि स्थगित भयो ।
अर्को सुनुवाइको मिति भने तोकिएको छैन ।
ओलीले १७ भदौ २०७८ मा माधव नेपालसहित एमाले छोडेका १४ सांसदलाई पदमुक्त गर्न माग गर्दै रिट दायर गरेका थिए ।
विवाद २०७७ पुसमा प्रतिनिधिसभा विघटनपछि नेकपा विभाजन हुँदा सुरु भएको हो ।
संसद् पुनःस्थापना भए पनि एमाले र माओवादी केन्द्रबीच अधिकारिकता विवाद टुङ्गिएन ।
एमालेले फ्लोर क्रस गरेको र पार्टी गतिविधि विरोधी काम गरेको भन्दै माधव नेपालसहित १४ सांसदविरुद्ध कारबाही गरेको थियो ।
तर, सभामुखले पदमुक्तको सूचना टाँस्न नमानेपछि विवाद अदालतसम्म पुगेको हो ।
सर्वोच्चमा मुद्दा २२ भदौ २०७८ देखि चार वर्षसम्म स्थगित हुँदै आएको छ ।
यो विवाद एकीकृत समाजवादीको वैधानिकतासँग पनि जोडिएको छ ।
एमालेको तर्फबाट दायर रिटमा निर्वाचन आयोगले प्रक्रिया नपुरा गरी पार्टी दर्ता दिएको भन्दै एकीकृत समाजवादीको वैधानिकता बदर गर्न माग गरिएको छ ।























