विश्व खबर 
अमेरिकाका राष्ट्रपति डोनाल्ड ट्रम्पले मंगलबार बिहानै इरान र इजरायलबीच युद्धविराम हुने दाबी गरेका छन्।
उनले आफ्नो सामाजिक सञ्जाल प्लेटफर्म ट्रुथ सोसलमा लेखेका छन्, ‘म यो घोषणा गर्न पाउँदा खुसी छु- इजरायल र इरानबीच १२ घण्टामा अर्थात् अबदेखि ६ घण्टामा पूर्ण युद्धविराम लागु हुनेछ। इरानले पहिलो १२ घण्टाका लागि आफ्नो हतियार राख्नेछ र इजरायलले अर्को १२ घण्टाका लागि आफ्नो हतियार बिसाउनेछ।’
उनले अगाडि लेखेका छन्, ‘म दुवै देशका नेताहरूलाई धन्यवाद दिन चाहन्छु, जसले यो १२ दिनको युद्ध अन्त्य गर्न मद्दत गरे। यो धेरै वर्षसम्म चल्न सक्थ्यो र पहिले कहिल्यै नदेखिएको मृत्यु र विनाश ल्याएको थियो। प्रधानमन्त्री नेतन्याहु, इजरायल र इरानका जनता, जो मध्य पूर्वमा शान्ति चाहन्छन्, बधाई छ। यो संसारका लागि एक महान् दिन हो!’
यद्यपि, इरान र इजरायलले युद्धविरामबारे अहिलेसम्म कुनै आधिकारिक बयान दिएका छैनन्। न्युयोर्क टाइम्सका अनुसार, इजरायली सेनाका प्रवक्ताले युद्धविरामबारे ट्रम्पको बयानमा प्रतिक्रिया दिन अस्वीकार गरे।
यसैबीच कतारले इरानले अमेरिकाको दोहा एयरबेसमा १९ वटा क्षेप्यास्त्र प्रहार गरेको बताएको छ। तर तीमध्ये १८ वटालाई रोकिएको र एउटा क्षेप्यास्त्र मात्र खसेको तथा यसले कुनै क्षति नभएको कतारको दाबी छ।
