विश्व खबर 
काठमाडौं– भारतीय प्रधानमन्त्री नरेन्द्र मोदीले अमेरिकी राष्ट्रपति डोनाल्ड ट्रम्पलाई पाकिस्तानसँगको द्विपक्षीय मामिलामा भारतले कुनै पनि तेस्रो पक्षीय मध्यस्थता कहिल्यै स्वीकार नगरेको र नगर्ने स्पष्ट पारिदिएका छन् ।
जी–७ सम्मेलनमा भाग लिन क्यानडा पुगेका मोदीले मंगलबार ट्रम्पसँग ३५ मिनेट फोनवार्ता गर्दै पाकिस्तानबारे भारतको आधिकारिक धारणा राखेका हुन् ।
इसराइल–इरान युद्धका कारण ट्रम्प सम्मेलन बीचमै छाडेर अमेरिका फर्किएकोले दुई नेताबीच प्रत्यक्ष भेट हुन सकेन ।
विदेश सचिव विक्रम मिस्रीका अनुसार, जम्मु–कश्मीरको पहलगाममा अप्रिल २२ मा भएको आतंकवादी आक्रमणपछि भारतले पाकिस्तानमाथि जवाफी कारबाही गरेको थियो ।
त्यसपछि दुई देशबीच चार दिन लामो सशस्त्र संघर्ष भएको थियो ।
ट्रम्पले यसबीच आफ्नै सामाजिक सञ्जाल ‘ट्रुथ सोसल’मार्फत अमेरिका नेतृत्वको मध्यस्थतामा भारत र पाकिस्तानबीच युद्धविराम भएको दाबी गरेका थिए ।
तर, मिस्रीले भने भारतीय सैन्य नेतृत्वसँग पाकिस्तानका समकक्षीले सम्पर्क गरेपछि मात्र कारबाही रोकिएको स्पष्ट पारेका छन् ।
पाकिस्तानले भने अमेरिकी मध्यस्थताको प्रशंसा गर्दै ट्रम्पलाई धन्यवाद दिएको छ । तर भारतले औपचारिक रूपमा यस्तो कुनै मध्यस्थता स्वीकार गरेको छैन ।
मोदीले ट्रम्पसँगको कुराकानीमा पनि यही अडान दोहो¥याएका हुन् ।
मोदीले फोनवार्तामा युद्धविरामको क्रममा भारत–अमेरिका व्यापार सम्झौता या कुनै प्रस्तावबारे चर्चा नभएको पनि ट्रम्पलाई स्पष्ट पारेका थिए ।
यसअघि ट्रम्पले भारत युद्ध रोकेमा व्यापार सम्झौता गरिने भन्दै दबाब दिएको दाबी गरेका थिए ।
फोनवार्ताको अन्त्यतिर मोदीले आगामी क्वाड शिखर सम्मेलनका लागि ट्रम्पलाई दिएको निमन्त्रणालाई ट्रम्पले स्वीकार गरेका छन् ।
प्रतिक्रिया दिनुहोस्