विश्व खबर 
काठमाडाैं । सन् २०१० मा दक्षिण पश्चिम भारतको मङ्गलोर विमानस्थलमा एयर इन्डिया एक्सप्रेसको जेट दुर्घटना भएर आगो लागेको थियो ।
उक्त दुर्घटनामा एक सय ६६ यात्रु र चालक दलका सदस्यमध्ये एक सय ५८ जनाको मृत्यु भएको थियो ।
दशकौँअघि सन् १९८५ जुनमा मन्ट्रियलबाट लन्डन उडेको एयर इन्डिया बोइङ ७४७ आयरल्यान्डको समुद्रमा दुर्घटनाग्रस्त भएको थियो ।
विमानमा तीन सय २९ जना यात्रु सवार थिए र कोही पनि बाँचेनन् ।
उग्रवादी सिखहरूले विमानले बोकेको सामानमा बम राखेको एउटा भारतीय आयोगले निर्धारण गरेको थियो ।
आज केहीबेर अघि अहमदाबादबाट लण्डन ग्याटविक जाँदै गरेको विमान टेकअफ गरेपछि दुर्घटनाग्रस्त भएको छ ।
यो विमान दिउँसो १ बजेर ३८ मिनेटमा अहमदाबादबाट उडेको थियो । विमानमा २४२ जना यात्रु र चालक दलका सदस्यहरू सवार थिए ।
विमान बोइङ ७८७–८ मोडलको थियो । सवारमध्ये १६९ जना भारतीय नागरिक, ५३ जना बेलायती, एक जना क्यानाडेली र सात जना पोर्चुगलका नागरिक रहेको एयर इन्डियाले जानकारी दिएको छ ।
दुर्घटनामा परेका घाइतेहरूलाई उपचारका लागि नजिकका अस्पतालहरूमा लगिएको बताएको छ ।
