विश्व खबर 
काठमाडौं । उपाधीको दावेदार भनिएको नेपाल साफ वुमन्स च्याम्पियनसिप २०२४ मा भुटानसँग बराबरीमा रोकिएको छ ।
त्रिपुरेश्वरस्थित दशरथ रंगशालामा भएको खेलमा नेपाल र भुटानले गोलरहित बराबरी खेल्दै अंक बाँडेका छन् ।
साफ वुमन्स च्याम्पियनसिप इतिहासमै नेपालले पहिलो पटक भुटानसँग बराबरी खेलेको हो । यस अघि भएका सबै खेलमा नेपाल विजयी भएको इतिहास छ ।
साफमा कुनै पनि टिमसँग नेपालको यो पहिलो बराबरी पनि हो । अन्य मुलुकसँग नेपालले जीत वा हारको स्पष्ट नतिजा निकालेको इतिहास छ ।
नेपाली टिममा सावित्रा भण्डारी नहुँदा नेपालले पाएका आधा दर्जन बढी अवसरहरु गोलमा परिणत गर्न सकेन । खेलमा सावित्राको अभाव प्रष्ट देखिएको थियो ।
नेपालले पहिलो हाफमा १३ औं, २० औं, २४ औं, २६ औं र ४० औं मिनेटमा गोलका अवसर सिर्जना गरेपनि भुटानी रक्षा पंक्तीलाई कटाएर बललाई जाली चुमाउन सकेन ।
दोस्रो हाफको सुरुमै नेपालले रेनुका नगरकोटे र सरु लिम्बुको स्थानमा रेखा पौंडेल र दीपा शाहीलाई मैदान पठाएको थियो । त्यसपछि नेपालले थप दबाब बनाएको थियो ।
दोस्रो हाफमा नेपालले ५२ औं, ८३ औं र ९० औं मिनेटमा पनि उत्कृष्ट अवसर सिर्जना गरेको थियो । तर कुनै पनि अवसर गोलमा परिणत नभएपछि नेपालले इतिहासमै पहिलोपटक साफ च्याम्पियन्सिपमा भुटानसँग बराबरी खेल्दै अंक बाडेको हो ।
बराबरीपछि समूह ए मा दुवै टोलीले समान १/१ अंक जोडेका छन् । नेपालले अब सोमबार आफ्नो दोस्रो खेल माल्दिभ्ससँग खेल्नेछ ।
