विश्व खबर 
काठमाडौं– नेपाल प्रिमियर लिग (एनपीएल) तेस्रो संस्करणअन्तर्गत आज भएको खेलमा विराटनगर किङ्ससँग चार विकेटको हार भोगेपछि पोखरा एभेन्जर्स पूरै प्रतियोगिताबाट बाहिरिएको छ ।
आजको हारपछि पोखरा प्लेअफ दौडबाट बाहिरिएको छ । उसले ६ खेलमध्ये पाँचमा पराजय र एक खेलमा मात्र जित निकालेको छ ।
आजको खेलमा पोखराले दिएको १३३ रनको सामान्य लक्ष्य विराटनगरले १९.२ ओभरमा ६ विकेटको क्षतिमा पूरा गरेको थियो ।
विराटनगरका लागि बसिर अहमदले ३७, लोकेश बमले ३३ र इमरान शेखले १० रनको योगदान दिए । अविजित रहेका इसुरु उडानाले २५ र शेहान जयसूर्याले १७ रन बनाए ।
बलिङतर्फ पोखराका कुशल भुर्तेल र रमेश मेन्डिसले दुई–दुई तथा विपीन खत्री र धनञ्जय लक्षणले एक–एक विकेट लिए ।
त्यसअघि कीर्तिपुरस्थित त्रिभुवन अन्तर्राष्ट्रिय क्रिकेट मैदानमा टस जितेर ब्याटिङ रोजेको पोखरा १७.५ ओभरमा अलआउट हुँदै १३२ रनमा समेटिएको थियो ।
ओपनिङ ब्याटर युवराज सम्राले उत्कृष्ट पारी खेलेर ४७ बलमा ८४ रन बनाए पनि पोखरालाई हारबाट जोगाउन सकेनन् ।
पोखराको लागि धनञ्जय लक्षणले २२ र सनी बिकेले १२ रन जोडे । बाँकी ब्याटरले भने दोहोरो अङ्कमा रन बनाउन सकेनन् ।
बलिङतर्फ विराटनगरका कप्तान सन्दीप लामिछानेले चार ओभरमा २७ रन दिएर सर्वाधिक ६ विकेट लिए । जसमा ह्याट्रिक समेत समावेश छ ।
त्यस्तै एन्जेलो म्याथ्युज, चरिथ असलङ्का र रुपेश सिंहले एक–एक विकेट लिए ।
यो जितपछि विराटनगरको प्लेअफ सम्भावना भने जीवितै रहेको छ । उसले ६ खेल खेल्दा तीनमा जित र तीन खेलमा हारको सामना गरेको छ ।
आजै साँझ ५ः०० बजेदेखि कर्णाली याक्स र लुम्बिनी लायन्स आमनेसामने हुँदैछन् ।
