विश्व खबर 
११ असोज, काठमाडौँ । चालु आर्थिक वर्षको पहिलो दुई महिनामा झण्डै सात अर्ब रुपैयाँको स्मार्टफोन आयात भएका छन् ।
भन्सार विभागको पछिल्लो तथ्याङ्कअनुसार साउन र भदौमा ६ अर्ब ७० करोड ८१ लाख ५८ हजार रुपैयाँ बराबरका चार लाख ५४ हजार नौ सय ५८ थान स्मार्टफोन आयात भएका हुन् ।
पेट्रोलियम पदार्थको आयात सबैभन्दा धेरै
यस अवधिमा सबैभन्दा धेरै पेट्रोलियम पदार्थको आयात भएको छ । विभागका अनुसार ११ अर्ब छ करोड ५२ लाख चार हजार रुपैयाँ बराबरको पेट्रोल आयात भएको छ भने १३ अर्ब ६४ करोड ५२ लाख ५० करोड बराबरको डिजेल आयात भएको छ ।
त्यस्तै, एलपी ग्यास नौ अर्ब ४२ करोड ५६ लाख ८५ हजार बराबरको आयात भएको छ । उक्त अवधिमा सवारी साधनको आयात पनि उच्च देखिएको छ । विभागले सार्वजनिक गरेको तथ्याङ्कअनुसार दुई अर्ब ९४ करोड बराबरको मोटरसाइकल र दुई अर्ब ४३ करोड २१ लाख २६ हजार रुपैयाँ बराबरको विद्युतीय सवारी आयात भएको छ ।
धेरै निर्यात हुनेमा कार्पेट, चिया र जुट
नेपालबाट बढी निर्यात हुनेमा कार्पेट, चिया, जुट, धागोलगायतका वस्तु छन् । विभागका अनुसार साउन र भदौ महिनामा सबैभन्दा धेरै एक अर्ब ९९ करोड ९६ लाख सात हजार रुपैयाँ बराबरको कार्पेट निर्यात भएको छ ।
त्यस्तै एक अर्ब १४ करोड २४ लाख ३२ हजार बराबरको चिया निर्यात भएको छ । जुट, धागो, जुसलगायतका वस्तु बढी निर्यात हुनेमा रहेका छन् ।
चालु आर्थिक वर्ष २०८१/८२ को सुरुवाती दुई महिनामा कूल दुई खर्ब ८७ अर्ब ६३ करोड ५७ लाख २८ हजार रुपैयाँ बराबरको वैदेशिक व्यापारमा नेपालले दुई खर्ब ३७ अर्ब ४४ करोड ९५ लाख २३ हजार रुपैयाँ बराबर व्यापार घाटा व्यहोरेको छ ।
साउन र भदौ महिनामा दुई खर्ब ६२ अर्ब ५४ करोड २६ लाख २६ हजार बराबरको आयात हुँदा २५ अर्ब नौ करोड ३१ लाख तीन हजार रुपैयाँ बराबरको मात्रै निर्यात भएको छ । रासस
प्रतिक्रिया दिनुहोस्