विश्व खबर 
काठमाडौं। नेपाल राष्ट्र बैंकले बैंक तथा वित्तीय संस्थाहरुमा अधिक तरलता थुप्रिएसँगै १ खर्ब अर्थात् १००अर्ब तरलता खिच्ने भएको छ । केन्द्रीय बैंकले आइतबार २१ दिने अवधिका लागि १०० अर्ब रूपैयाँ निक्षेप संकलन उपकरण मार्फत तरलता खिच्न लागेको हो । यसका लागि बैंकले अपरान्ह ३ बजे बोलकबोल गर्नेछ ।
२१ दिन अवधिको निक्षेप संकलन उपकरणको भदौ २३ गते साँवा तथा ब्याज भुक्तानी गरिने राष्ट्र बैंकले बताएको छ। निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्म बोलकबोल गर्न पाउने छन् ।
उक्त निक्षेप संकलन उपकरणमा लगानी गर्ने बैंकले त्यसलाई राष्ट्र बैंक बाहेक अन्य बैंक तथा वित्तीय संस्थामा धितोको रुपमा प्रयोग गर्न सक्नेछन् । केन्द्रीय बैंकले भदौं लागेसँगै पहिलोपटक तरलता खिच्न लागेको हो ।
अघिल्लो महिना साउनमा केन्द्रीय बैंकले ५ पटक तरलता खिचेको थियो । जसमा साउन २ गते ५० अर्ब, ९ , १६, २३ र ३० गते क्रमशः ४० अर्ब रूपैयाँ तरलता खिचेको थियो ।
