विश्व खबर 
काठमाडौं- रामबहादुर बम्जन बाल यौन दुराचार गरेको कसुरमा दोषी ठहर भएका छन् । सोमबार जिल्ला अदालत सर्लाहीका न्यायाधीश जीवानकुमार भण्डारीको इजलासले बम्जनलाई दोषी ठहर गरेको हो ।
बम्जनलाई कति सजाय हुने भन्ने विस्तृत फैसला भने असार १७ गते आउनेछ ।
सर्लाही जिल्ला अदालतका न्यायाधीश विष्णुप्रसाद रेग्मीको इजलासले गत पुस २६ गते पुर्पक्षका लागि कारागार चलानको आदेश दिएपछि बम्जन महोत्तरी कारागार जलेश्वरमा छन् । यौन सन्तुष्टि प्राप्त गर्ने तथा बाल यौनशोषण अभियोगमा पुर्पक्षमा रहेका बम्जन निर्दोष रहेको दाबीसहित सोमबारको इजलासमा वरिष्ठ अधिवक्ता सीताराम केसी एवं अधिवक्ताहरु राम घिमिरे, मनोहर झा, राष्ट्र विमोचन तिमल्सिना र दिलीप झाले बहस गरेका थिए ।
अभियोगबमोजिम कैद सजायको मागसहित जिल्ला सरकारी वकिल कार्यालय मलंगवाका प्रमुख जिल्ला न्यायधिवक्ता कैलाश दाहालले बहस गरेका थिए । यसअघि ३ पटकसम्म बम्जन विरुद्धको मुद्दा पेसी चढे पनि उनका वकिलहरुले २ तथा सरकारी वकिलले १ चोटी निवेदन दिएर सारेका थिए ।
सर्लाही जिल्ला अदालतले २०७७ असार २१ गते जारी गरेको पक्राउ पुर्जीका आधारमा बम्जनलाई काठमाडौंको बूढानीलकण्ठबाट सीआईबीको टोलीले पक्राउ गरेको थियो ।
