विश्व खबर 
काठमाडौं- प्रधानमन्त्री पुष्पकमल दाहाल प्रचण्डसँग राष्ट्रिय स्वतन्त्र पार्टी (रास्वपा)का सभापति रवि लामिछानेले भेटवार्ता गरेका छन् ।
सरकारबारे निर्णय गर्नुअगाडि आज बिहान प्रधानमन्त्री निवास बालुवाटार गएर लामिछानेले प्रचण्डसँग भेटवार्ता गरेका हुन् ।
उनीहरुबीच समसामयिक राजनीतिक घटनाक्रम र सरकारबारे छलफल भएको बालुवाटार स्रोतले जनाएको छ। भेटमा प्रधानमन्त्री प्रचण्डले लामिछानेलाई पुनः सांसदमा निर्वाचन भएकोमा बधाईसमेत दिएका छन्।
सरकारबारे निर्णय गर्न रास्वपाले केन्द्रीय कार्य समिति र संसदीय दलको बैठक सोमबार बोलाइएको छ। संसदीय दलको नेता चयन र राजनीतिक परिस्थितिबारे छलफल गर्न राष्ट्रिय स्वतन्त्र पार्टीले केन्द्रीय कार्यसमिति र संसदीय दलको बैठक बोलाएको जनाएको छ ।
सोमबार बिहान ११ बजे केन्द्रीय समिति र दिउँसो ३ बजे संसदीय दलको बैठकमा संसदीय दलको नेता चयन हुने बताइएको छ। रवि लामिछानेको सांसद पद गुमेपछि उपसभापति डोलप्रसाल अर्याललाई संसदीय दलको नेता बनाइएको थियो। लामिछाने पुन निर्वाचित भएपछि अर्यालले संसदीय दलको नेताबाट राजीनामा दिएका छन्।
चितवनबाटै लामिछानेले न्युनतम साझा कार्यक्रममा भएको भ्रष्टाचारको छानबिन हुनुपर्छ भन्ने बुँदा हटेको सरकारले हटाएको भन्दै सरकारलाई दिएको समर्थन फिर्ता लिने संकेत गरेका थिए। ‘सरकारलाई दिएको समर्थनको औचित्य पुष्टि हुनुपर्छ। न्युनतम साझा कार्यक्रममा भएको भ्रष्टाचारको छानबिन हुनपर्छ भन्ने बुँदा हट्यो।’ उनले भनेका थिए,‘सरकारलाई दिएको समर्थनमा पुनर्विचार गर्ने हो।’
प्रतिक्रिया दिनुहोस्