विश्व खबर 
काठमाडौं । इराकासँग भएको मैत्रीपूर्ण फुटबल खेलमा नेपाल ६–२ गोल अन्तरले पराजित भएको छ । इराकको बरसास्थित अल फेहा रंगशालामा भएको खेलको पहिलो हाफमा नेपालले २ गोल गर्दा इराकले ४ गोल गरेको थियो ।
खेलको सातौं मिनेटमा इराकका अला अब्दुल जहराले इराकलाई अग्रता दिलाए पनि त्यसको एक मिनेटमै नेपालले पुनरागमन गर्दै खेललाई १–१ को स्थितिमा पुर्याएको थियो । अञ्जन विष्टको प्रहारलाई इराकका डिफेन्डर अहमद इब्राहिम खलाफले नेटको दिशा देखाएका थिए ।
खेलको २९औं मिनेटमा नेपालबाट डेब्यु गरेका मनिष डाँगीको गोलले नेपालाई २–१ को अग्रता दिलायो । इराकी डिफेन्डर र गोलकिपरलाई बिट गर्दै डाँगीले एकदमै सटिक प्रहारले जाली चुमेको थियो ।
आधा घण्टासम्म खेलमा डटेर रहेको नेपालको प्रदर्शन त्यसपछि भने खस्किन थाल्यो । नेपालको खस्किएको प्रदर्शनको फाइदा इराकी टोलीले उठाउने मौका पायो । खेलको ३९ औं मिनेटमा मोहम्मद अब्दुुलजहराले र त्यसको पाँच मिनेटभित्रै अयमन हुसेनले चौथो गोल थप्दै पहिलो हाफसम्म खेललाई ४–२ को स्थितिमा पुर्याए ।
दोस्रो हाफको ६७ र ७५औं मिनेटमा अलि अलशमारी र सज्जाद जसीमको गोलको मद्दतले इराकले ६–२ गोल अन्तरले मैत्रीपूर्ण खेल जितेको हो । यसअघि २० वर्ष अघि इराकसँग भएको खेलमा पनि इराकले ४–२ गोलले जितेको थियो ।
मैत्रीपूर्ण खेलमा नेपालका लागि गोलकर्ता डाँगीसँगै डिफेन्डर गौतम श्रेष्ठले पनि सिनियर टीममा डेब्यु गरेका हुन् ।
प्रतिक्रिया दिनुहोस्