विश्व खबर 
काठमाडौं- आफ्ना साझेदारहरुको हत्या गरेको आरोपमा पक्राउ परेका अनिल मण्डलसहित तीन जनालाई मोरङ प्रहरीले सार्वजनिक गरेको छ ।
प्रहरीले आज बिहान पत्रकार सम्मेलन गरी सिरहा नगरपालिका–२१ स्थायी घर भई काठमाडौंको बल्खु बस्ने ३१ वर्षीय अनिल मण्डल, मोरङको जहदा गाउँपालिका–४ सिस्वनी घर भएका अमित साह भनिने दिनानाथ सोनार र मोरङको धनपालथान गाउँपालिका–७ कमलपुरका ६२ वर्षीय नासिर आलमलाई सार्वजनिक गरेको हो । यीमध्ये मण्डल मुख्य आरोपी हुन् । अन्य उनका सहयोगीहरु हुन् ।
कारोबारको रकम एकलौटी बनाउने उद्देश्यले उनका साझेदारहरु राजेन्द्र कुमार श्रेष्ठ, शम्भु कुमार चौधरी र मोहन लिम्बुको हत्या गरेको अनुसन्धानबाट खुलेको प्रहरीले जनाएको छ ।
श्रेष्ठ र चौधरीको शव मोरङको धनपालथानस्थित उखुबारीमा खाल्डो खनेर गाडिएको थियो भने लिम्बुको शव बिहीबार ललितपुर महानगरपालिका–१२ ठेंचोस्थित एक गोदाम घर रहेको कम्पाउण्डमा गाडिएको अवस्थामा फेला परेको थियो ।
यस्तो थियो हत्याको प्रकृति:
ललितपुरको गोदावरी नगरपालिका–१२, थेचो बसपार्कमा रहेको घरमा बिहीबार साँझ एकहुल प्रहरी छिर्दा जमुना थापा मगर छक्क परिन् । घरधनी छोरो प्रदीप थापा मगर वैदेशिक रोजगारीका लागि दुबईमा थिए, बुहारी दिप्ती माइतमै बस्थिन् ।
जमुनाले प्रहरीलाई घरमा ताला फोड्न खोज्नुको कारण सोधिन् । प्रहरीले घर पछाडि खोस्रिएको जस्तो ठाउँ देखाउँदै ‘एक जना व्यक्तिको शव हुनसक्ने आशंका गरेको’ बताए । जमुनाले जवाफ फर्काइन्, ‘के–को शव हुनु वेलावेला मुसाले खोस्रिराख्छ, मैले त इँटो पनि राख्दिन्थे, त्यही हो ।’
उनलाई त्यहाँ कसैको विभत्स तरिकाले हत्या गरेर शव गाडिएको होला भन्ने कल्पनै थिएन । तर सँगै रहेको अर्को छोराको घरको छतबाट हेर्दाहेर्दै प्रहरीले शव निकाल्यो । जमुनाले अनलाइनखबरसँग सुनाइन्, ‘शव देख्दा त झसंग भए, अनुहार चिनिने अवस्थामै थिएन ।’
उनकाअनुसार तीनै छोरा विदेश छन्, थेचोमा दुई छोरा प्रदीप र देवराजको घरसँगै थियो । प्रदीपको घर पछाडि खाल्टोमा गाडिएको अवस्थामा तेह्रथुम, संग्रान्ती गाउँपालिका–२ का ६२ वर्षीय मोहन लिम्बुको शव बरामद भएको छ ।
गोदावरी नगरपालिका–४ की वडा सदस्य शोभा कार्कीका अनुसार प्रदीपको घर बाल संसार नामक मन्टेश्वरीलाई भाडामा दिइएको थियो । ‘कोरोना महामारीका कारण मन्टेश्वरी चलेन, बन्द भएपछि घरमा ताला थियो’ कार्कीले सुनाइन्, ‘तीन महिना अघि मात्रै मान्छे बस्न थालेका रहेछन् ।’
शव गलाउन नुनको प्रयोग
जुमनाका अनुसार घर खाली भएपछि बुहारी दिप्तीले फेसबुकमा कोठा खाली रहेको सूचना पोष्ट गरेकी थिइन् । फेसबुकबाटै उनले मासिक ३० हजार तिर्ने गरी अनिल मण्डललाई घर भाडामा दिएकी थिइन् । जमुना भन्छिन्, ‘अनलाइनबाट भाडामा दिएको भन्ने थाहा थियो, तर को आउँछन्, जान्छन्, देखिन्नथ्यो ।’
उनी कहिले काहीँ प्रदिपको घरमा जानखोज्थिन्, तर सधैँ ताला लागेको हुन्थ्यो । ‘वेलावेला गोडमेल गर्न मन लाग्थ्यो, तर भित्र छिर्न पाइन्थ्यो, कहिल्यै मान्छे पनि देखिएन’ उनी भन्छिन्, ‘यताकी बुहारीले पनि एकपटक मात्र इन्डियन जस्तो मान्छे देखेकी रैछिन् ।’
छिमेकी अस्मिता थापा पनि ‘नयाँ मान्छेलाई घर भाडामा दिएको भन्ने मात्र सुनेको’ बताउँछिन् । बिहीबार एकाएक घर पछाडि खाल्डो खनेर मान्छे पुरेको सुन्दा अचम्म लागेको उनले बताइन् । ‘डोरीले बाँधेर शव राखेर नुन हालेर माथिबाट डलान गरेको रहेछ,’ घटनास्थलमा भेटिएकी थापाले अनलाइनखबरसँग भनिन्, ‘खनेकाले होला, छेउछाउ जाँदा पनि एकदम गन्ध आइरहन्छ ।’
नजिकै रहेको किराना पसलका सञ्चालक गोविन्द महर्जन चाहिँ कहिलेकाहीँ शव भेटिएको घरबाट ३र४ जना रासन लिन आउने गरेको बताउँछन् । ‘गार्मेन्टको काम गर्ने भन्थे, धेरै कुरा हुँदैन्थ्यो’ उनले भने, ‘अहिले शव भेटिएको सुन्दा पो छक्क परेँ ।’
१३ गते बिराटनगर लगिएका थिए मुख्य आरोपी
मोरङको धनपालथान गाउँपालिका–७, कमलपुरको वस्ती नजिकै रहेको उखुबारीमा १३ माघमा दुई जनाको शव भेटिएको थियो । उखुबारीमा काम गर्ने मजदुरले शरीरको केही भाग गाडिएको अवस्थामा शव देखेपछि प्रहरीलाई खबर गरेका थिए ।
घटनास्थल पुगेको जिल्ला प्रहरी कार्यालय, मोरङको टोलीले १३ गतै नै एउटा शव फेला पारेको थियो, त्यसको नजिकै पनि एउटा शंकास्पद खाल्डो फेला परेको थियो । अर्को दिन त्यहाँ उत्खनन् गर्दा थप एक जनाको शव भेटिएको थियो ।
अनुसन्धानका क्रममा उखुबारीमा भेटिएको शव राजेन्द्रकुमार श्रेष्ठ र शम्भु चौधरीको भएको खुल्यो । भक्तपुरका श्रेष्ठ लेनदेन मिलाउनु छ भन्दै मंसिर पहिलो साता पूर्वतिर हिँडेको उनको परिवारले बतायो । कल डिटेल रेकर्ड ९सीडीआर० ले पनि त्यही संकेत गर्छ । उनीसँग सम्पर्क भएकाहरुको विवरण खोतल्दै जाँदा प्रहरीले चौधरी, मण्डल र बिहीबार शव भेटिएका मोहन लिम्बुको कनेक्सन फेला पा¥यो ।
‘शम्भुको शव भेटिइहाल्यो, अनिल मण्डल र मोहन लिम्बु चाहिँ कता छन् भनेर खोज्दा लिम्बुको मोबाइल अफ थियो, मण्डल चाहिँ ललितपुरतिरै देखिए’ अनुसन्धानमा संलग्न एक अधिकृत भन्छन्, ‘त्यसपछि अपराध अनुसन्धान महाशाखाले उनीसहित केहीलाई निगरानीमा राखेर सोधपुछ ग¥यो, तर उनले कसूर स्वीकारेनन् ।’
चाररपाँच दिनसम्म पनि मौन बसेका मण्डललाई बिहीबार दिउँसो १२ बजेतिर त्रिभुवन अन्तर्राष्ट्रिय विमानस्थलमार्फत मोरङ लगिएको स्रोत बताउँछ । मोरङमा उनलाई सहयोग गर्ने दुई जना पहिल्यै हिरासतमा पुगिसकेका थिए । ‘प्रमाण अगाडि भएपछि उनले पनि इन्कार गर्न सकेनन्, लिम्बुको पनि हत्या गरिसकेको खुलाए’ प्रहरी स्रोत भन्छ, ‘थेचोमा रहेको गोदाम पछाडि गाडेको बताएपछि जिल्लाबाट एक जना डीएसपी सा’बलाई नै काठमाडौं पठाएका थियौं ।’
डीएसपी, अपराध महाशाखाको टोलीसँगै थेचो गए, नभन्दै शव पनि त्यहीँबाट बरामद भयो ।
एक महिनाअघि सँगै लिएर गएर हत्या
जिल्ला प्रहरी कार्यालय, मोरङले गरेको अनुसन्धानका क्रममा मण्डल २८ मंसिरमा बिराटनगर गएको देखिन्छ । ‘त्यतिवेला विराटनगरमा मारिएका राजेन्द्र र शम्भु पनि उनीसँगै गएका थिए’ एक अधिकृतले अनलाइनखबरसँग भने, ‘थेचोमा लिम्बुको हत्या भइसकेको रहेछ, तर राजेन्द्र र शम्भुलाई थाहै थिएन ।’
स्रोतका अनुसार बिराटनगर पुगुञ्जेल मण्डल अर्का साझेदार लिम्बु पनि आउँछन् भनिरहेका थिए । केही दिन बिराटनगरमै बस्दा पनि उनीसँग सम्पर्क भएन । राजेन्द्र र शम्भुले सोधीखोजी गरिरहे । तर मोहनबारे जानकारी नपाउँदै अनिलले केही व्यक्तिको सहयोग लिएर राजेन्द्र र शम्भुको पनि हत्या गरेको प्रहरी बताउँछ ।
प्रयास गरिएको छ । ‘बिराटनगरमा शव नभेटिएको भए यो घटना बाहिर नआउन पनि सक्थ्यो, अथवा लामो समय लाग्न सक्थ्यो’ एक अधिकृत भन्छन्, ‘उनले पर्फेक्ट योजना बनाएका थिए, तर ३र३ जनाको हत्या लुकाउन कहाँ सजिलो थियो र!’
स्रोतका अनुसार चार जना मिलेर जग्गा, हाइड्रो पावर, सिमेन्ट उद्योग लगायतमा लगानी गरेका थिए । ‘एउटा व्यवसायको एक करोड बढी कमिसन आउँदै थियो, त्यही लोभमा मण्डलले तीन जनाको हत्या गराएको देखिन्छ’ ती अधिकृत भन्छन्, ‘हत्यामा उनले पैसा दिएर सहयोगीहरु प्रयोग गरेको पाइयो ।’ अनलाइन खबरबाट
प्रतिक्रिया दिनुहोस्