images
images
  • प्रधानमन्त्री बालेनकै निर्देशनमा हटाइयो नेपाल–भारत सीमा विवाद एजेन्डा

    काठमाडौं– प्रधानमन्त्री बालेन शाहको भारत भ्रमणको औपचारिक एजेन्डामा नेपाल–भारत सीमा विवादको विषय समेटिएको छैन ।

    भ्रमणअघि परराष्ट्र मन्त्रालयमा सीमा विवादबारे छलफल हुने अपेक्षा गरिए पनि प्रधानमन्त्रीकै निर्देशनमा उक्त विषय तत्कालका लागि एजेन्डाबाट हटाइएको हो ।

    प्रधानमन्त्री कार्यालयका एक उच्च स्रोतका अनुसार भ्रमणलाई विवादरहित बनाउँदै द्विपक्षीय संवाद र सहकार्यका विषयमा केन्द्रित गर्ने उद्देश्यले सीमा विवादलाई प्राथमिकतामा नराखिएको हो ।

    प्रधानमन्त्री शाहले गत जेठ १७ गते संसद्मा नेपाल र भारत दुवैले एकअर्काको भूमि मिचेको विषय अध्ययन गरी तथ्यका आधारमा समाधान खोज्नुपर्ने बताएका थिए ।

    काठमाडौं महानगरपालिकाको मेयर हुँदा उनले आफ्नो कार्यकक्षमा ग्रेटर नेपालको नक्सासमेत राखेका थिए ।

    यी अभिव्यक्तिका कारण भारत भ्रमणमा सीमा विवादको विषय उठ्ने अपेक्षा गरिएको थियो ।

    तर, भ्रमणको तयारीका क्रममा छलफल भए पनि अन्तिम एजेन्डामा उक्त विषय समावेश हुन सकेन ।

    भारतका लागि नेपालका पूर्वराजदूत नीलाम्बर आचार्यले भने सीमा विवादको विषय भ्रमणमा उठाउनुपर्ने बताएका छन् ।

    संवादको ढोका खुला राख्दै समाधानको पहल गर्नुपर्ने उनको भनाइ छ ।

    त्यस्तै, कूटनीतिक मामिलाका जानकार मोहनकृष्ण श्रेष्ठले पनि सीमा विवादलाई द्विपक्षीय छलफलको प्राथमिकतामा राख्नुपर्ने बताएका छन् ।

    उनका अनुसार संवादबिना सीमा समस्याको समाधान सम्भव छैन ।

    प्रतिक्रिया दिनुहोस्
    images
    images