विश्व खबर 
काठमाडौं– इरानका सर्वोच्च नेताको विशेषज्ञ सभा (एसेम्बली अफ एक्सपर्ट्स) ले एक विज्ञप्ति जारी गर्दै परमाणु हतियारको प्रसार रोक्ने सन्धि (एनपीटी) बाट बाहिरिने सम्भावनामाथि विचार गर्न माग गरेको छ । सभाले देशको रक्षा नीतिको समीक्षा गर्न समेत माग गरेको छ।
बीबीसी फारसीका अनुसार विज्ञप्तिमा एनपीटीबाट बाहिरिने विषयको समीक्षा र आवश्यक सुरक्षा कवच तयार गर्न रक्षा सिद्धान्तमा परिवर्तन गर्नु अब ‘एक आवश्यकता’ र ‘राष्ट्रिय माग’ बनिसकेको उल्लेख छ ।
विशेषज्ञ सभाले यदि इरानमाथि पुनः आक्रमण भएमा देशका सशस्त्र सेनाले तत्काल र प्रभावकारी ढङ्गले जवाफ दिने चेतावनी पनि दिएको छ । यस संस्थाले विभिन्न सरकारी विभागहरूको सहभागिता र सर्वोच्च नेतृत्वको निगरानीमा युद्ध अर्थ व्यवस्था मुख्यालय (वार इकोनोमी हेडक्वार्टर) निर्माण गर्न समेत आह्वान गरेको छ ।
सभाले विशेषगरी संस्कृति र हिजाबसँग जोडिएका मुद्दाहरूको उल्लेख गरेको छ ।
पछिल्ला हप्ताहरूमा इरानका कैयौं अधिकारी र सांसदहरूले पनि परमाणु नीतिको समीक्षा गर्न माग गरेका थिए । केही नेताहरूले त इरान परमाणु हतियार हासिल गर्ने दिशामा अगाडि बढ्नुपर्ने भन्दै खुलेरै अभिव्यक्ति दिएका छन् ।
इरानी विदेश मन्त्रालयका प्रवक्ता इस्माइल बकाईले इरान अझै पनि परमाणु हतियारको प्रसार रोक्ने सन्धिप्रति प्रतिबद्ध रहेको दोहोर्याएका छन् ।
