विश्व खबर 
काठमाडौं – यू–१९ एसिया कप क्रिकेटअन्तर्गत चिरप्रतिद्वन्द्वी भारत र पाकिस्तानबीचको बहुप्रतीक्षित खेल आज (आइतबार) हुँदैछ । ओमानको अल अमिरात क्रिकेट मैदानमा हुने खेल नेपाली समयअनुसार बिहान १०ः३० बजे सुरु हुनेछ । टस बिहान १० बजे हुनेछ ।
प्रतियोगितामा दुवै टोलीले विजयी सुरुआत गरेका छन् । भारतले पहिलो खेलमा नेपाललाई १० विकेटले पराजित गरेको थियो भने पाकिस्तानले संयुक्त अरब इमिरेट्स (यूएई लाई ९ विकेटले हराएको थियो । त्यसैले आजको खेल दुवै टोलीका लागि समूहमा आफ्नो बलियो स्थिति कायम राख्ने अवसर हुनेछ ।
भारतको टोलीमा पूर्वक्रिकेटर वीरेन्द्र सेहवागका छोरा आर्यवीर सेहवाग आकर्षणमा रहनेछन् । उनले नेपालविरुद्धको पहिलो खेलमा ५२ बलमा अविजित ७० रन बनाउँदै आफ्नो क्षमता देखाएका थिए । भारतको जितमा उनको उक्त प्रदर्शन महत्त्वपूर्ण बनेको थियो ।
यता पाकिस्तानका उस्मान खान पनि उत्कृष्ट लयमा छन् । उनले यूएईविरुद्धको पहिलो खेलमा १२० बलमा अविजित १३९ रन बनाएका थिए । उनी पनि पहिलो खेलमा पाकिस्तानका सर्वाधिक रनकर्ता हुन् ।
पहिलो खेलमा प्रभावशाली प्रदर्शन गरेका आर्यवीर र उस्मानबीचको प्रदर्शनले पनि आजको प्रतिस्पर्धालाई थप रोचक बनाउने अपेक्षा गरिएको छ ।
