विश्व खबर 
काठमाडौं– अमेरिकाले खाडी क्षेत्रका मुलुकहरूलाई अमेरिकी मध्यावधि निर्वाचनपछि इरानविरुद्ध तीव्र सैन्य कारबाहीका लागि तयार रहन आग्रह गरेको छ । यस विषयमा जानकार व्यक्तिहरूलाई उद्धृत गर्दै ‘वाल स्ट्रिट जर्नल’ ले बुधबार यस्तो समाचार प्रकाशित गरेको हो ।
उक्त समाचार अनुसार अमेरिका र इजरायल इरानविरुद्ध अर्को चरणको तीव्र सैन्य कारबाहीको तयारी गरिरहेका छन् । मध्यपूर्वमा रहेका अमेरिकी सेनाले गोलाबारुदको भण्डार पुनः पूर्ति गरिरहेका छन् भने बमवर्षक र लडाकु विमानहरू पनि सम्भावित आक्रमणका लागि तयारी अवस्थामा राखिएका छन् ।
इजरायलले पनि सम्भावित नयाँ आक्रमणका लागि योजना तयार पारेको र लक्ष्यहरू पहिचान गरिसकेको जर्नलले जनाएको छ ।
अमेरिकी राष्ट्रपति डोनाल्ड ट्रम्पले अन्तिम निर्णय गरिनसकेको जनाउँदै इरानका पूर्वाधार र आणविक केन्द्रहरूलाई लक्षित गरी ठूलो आक्रमण गर्नेतिर अघि बढेको समाचारमा उल्लेख छ ।
यसअघि इरानसँग कुनै सम्झौता गर्ने प्रयास पनि गर्न सक्ने बताउँदै गत हप्ता ट्रम्पले अमेरिकाले फेरि अर्को बमबारी अभियान सुरु गर्न सक्ने वा इरान कुनै सम्झौताका लागि सहमत हुन सक्ने बताएका थिए ।
राष्ट्रपति ट्रम्पले मध्यावधि निर्वाचनअघि भने इरानमाथि आक्रमण नगर्ने बताएका छन् ।
यसैबीच इरानका विदेशमन्त्री अब्बास अराघचीले इजरायलको उक्साहटमा इरानमाथि कुनै पनि आक्रमण भए त्यसले विश्व बजारमा ‘विनाशकारी असर’ पार्ने चेतावनी दिएका छन् ।
नयाँ सरकार गठन गर्ने प्रयासमा रहेका प्रधानमन्त्री बेन्जामिन नेतान्याहुले नजिकको चुनावी प्रतिस्पर्धापछि बुधबार इरानबाट उत्पन्न ‘अस्तित्वगत खतरा’ अन्त्य गर्न अमेरिकी राष्ट्रपति डोनाल्ड ट्रम्पसँग मिलेर काम गर्न सकिने बताएका थिए ।
अराघचीले एक पोस्टमार्फत भनेका छन्, ‘फारसको खाडी क्षेत्रमा इजरायलको उक्साहटमा हुने कुनै पनि सैन्य दुस्साहसले अन्तर्राष्ट्रिय बजारमा पार्ने विनाशकारी असर ग्यास आपूर्तिकर्ता र उपभोक्ता दुवैका लागि प्रमुख चिन्ताको विषय बनेको छ ।’
फेब्रुअरी २८ मा अमेरिकाको नेतृत्वमा इजरायलले इरानमाथि गरेको आक्रमणबाट सुरु भएको युद्धमा पुनः आक्रमण हुन सक्ने सम्भावना अमेरिकाले र इजरायलले पछिल्ला दिनमा व्यक्त गरेका छन् ।
इरानका राष्ट्रपति मसुद पेजेस्कियानसँगै विदेशमन्त्री अराघचीले रुसको मस्कोमा आयोजित ग्यास निर्यातक देशहरूको संगठन (जीईसीएफ) को शिखर सम्मेलनमा भाग लिएका थिए ।
