विश्व खबर 
काठमाडौं – नेपाल आयल निगमले एलपी ग्यास बिक्री गर्दा ग्राहकलाई अनिवार्य रूपमा मूल्य अभिवृद्धि कर (भ्याटं) बिल जारी गर्न बिक्रेताहरूलाई पुनः निर्देशन दिएको छ । ग्यास बिक्री गरेपछि बिलबिजक नदिने गरेको गुनासो आएपछि निगमले पुरानै निर्णय कार्यान्वयन गर्न ताकेता गरेको हो ।
उद्योग, वाणिज्य तथा आपूर्तिमन्त्री दीपककुमार साहले सोमबार साँझ निगमको निर्देशनसम्बन्धी पत्र सामाजिक सञ्जालमार्फत सार्वजनिक गरेका छन् । निगमको एलपी ग्यास तथा एभिएसन विभागले जारी गरेको पत्रमा केही ग्यास बिक्रेताले बिक्रीपछि बिलबिजक जारी नगरेको गुनासो प्राप्त भएको उल्लेख छ ।
निगमले यसअघि पनि २०८१ साउन ३० र २०८१ माघ १० गते सम्बन्धित संस्थालाई पत्राचार गर्दै निर्णय कार्यान्वयन गर्न आग्रह गरेको थियो । तर, ग्यास बिक्री गर्दा बिलबिजक नदिने गरेको गुनासो पुनः आएपछि निगमले अनिवार्य भ्याट बिल जारी गर्ने व्यवस्था मिलाउन निर्देशन दिएको हो ।
निगमको पत्रमा ग्यास बिक्री गर्ने बिक्रेताले ग्राहकलाई अनिवार्य रूपमा भ्याट बिल जारी गरेर मात्रै बिक्री–वितरण गर्नुपर्ने उल्लेख छ । यसले ग्यास कारोबारको अभिलेख व्यवस्थित बनाउन, बिक्री प्रक्रियामा पारदर्शिता कायम गर्न र करसम्बन्धी प्रावधानको पालना सुनिश्चित गर्न सहयोग पुग्ने अपेक्षा गरिएको छ ।
ग्यास खरिद गर्दा बिल नपाउने उपभोक्ताले कारोबारको प्रमाण प्राप्त गर्न कठिनाइ भोग्न सक्छन् । अनिवार्य बिलबिजकको व्यवस्था प्रभावकारी रूपमा कार्यान्वयन भएमा उपभोक्ताले खरिदको प्रमाण पाउने र बिक्रेताको कारोबारको अभिलेख राख्न सहज हुने देखिन्छ ।
यद्यपि, निर्देशन उल्लङ्घन गर्ने बिक्रेतामाथि कस्तो कारबाही हुन्छ भन्ने विषयमा उपलब्ध विवरणमा स्पष्ट उल्लेख छैन। त्यसैले निर्देशनको प्रभावकारिता अनुगमन, कार्यान्वयन र नियम उल्लङ्घन भएमा अपनाइने कारबाहीमा निर्भर रहनेछ ।
