विश्व खबर 
काठमाडौं– नेपालको प्राथमिक सेयर बजार चार महिनादेखि ठप्प हुँदा छिमेकी भारतमा भने एकैदिन नौ कम्पनीले सर्वसाधारणका लागि प्राथमिक सेयर निष्कासन गरेका छन् ।
नेपालमा नियामक नेतृत्व परिवर्तन, नीतिगत अन्योल र नयाँ व्यवस्था निर्माणमा भएको ढिलाइका कारण नयाँ कम्पनीले प्राथमिक सेयर निष्कासनको अनुमति पाउन सकेका छैनन् ।
हाल बेनी हाइड्रोपावरको प्राथमिक सेयर निष्कासन भइरहे पनि यो नयाँ स्वीकृति होइन । कम्पनीले अघिल्लो वर्ष नै अनुमति पाइसकेको थियो । आन्तरिक कारणले रोकिएको निष्कासन प्रक्रिया अहिले अघि बढाइएको हो ।
प्राथमिक बजार लामो समय बन्द हुँदा लगानीकर्ता र व्यवसायीले बजारको विस्तार तथा नयाँ पुँजी परिचालनमा असर पर्ने चिन्ता व्यक्त गरेका छन् । अर्कोतर्फ, दोस्रो बजारका केही लगानीकर्ताले बजारमा निरन्तर नयाँ सेयर तथा हकप्रद थपिँदा आपूर्ति बढेको भन्दै केही समय प्राथमिक सेयर निष्कासन रोक्नुपर्ने तर्क गर्दै आएका छन् ।
यता भारतमा भने कम्पनीको आकार र प्रकृतिअनुसार मुख्य बजार र साना तथा मझौला उद्योग केन्द्रित छुट्टाछुट्टै प्राथमिक सेयर बजार सञ्चालनमा छन् । मुख्य बजारतर्फ ठूला तथा स्थापित कम्पनी र साना तथा मझौला उद्योग केन्द्रित बजारतर्फ साना कम्पनीले पुँजी जुटाउँदै आएका छन् ।
भारतमा एकैदिन छ ठूला कम्पनी र तीन साना तथा मझौला कम्पनी गरी नौ कम्पनीले प्राथमिक सेयर निष्कासन सुरु गरेका छन् । यसबाट ठूलो मात्रामा पुँजी परिचालन भइरहेको छ ।
नेपालमा भने प्राथमिक बजारलाई निरन्तरता दिनुको सट्टा दोस्रो बजारको उतारचढावसँग जोडेर निष्कासन रोक्ने प्रवृत्तिले बजारको स्वाभाविक माग–आपूर्ति चक्र प्रभावित हुने जानकारहरूको भनाइ छ ।
विशेषज्ञहरूले जलविद्युत्, उत्पादन, प्रविधि तथा अन्य व्यवसायका लागि दीर्घकालीन पुँजी जुटाउने प्राथमिक सेयर बजारलाई नियमित, पारदर्शी र व्यावसायिक बनाउनुपर्नेमा जोड दिएका छन् ।
नेपालको पुँजी बजारलाई क्षेत्रीय स्तरमा प्रतिस्पर्धी बनाउने लक्ष्य लिइरहँदा महिनौँसम्म प्राथमिक बजार ठप्प रहनु भने गम्भीर विरोधाभासका रूपमा देखिएको छ ।
