विश्व खबर 
काठमाडौं– नेपाली कांग्रेसको १५औं महाधिवेशनको मिति नजिकिँदै गर्दा पार्टीभित्रको विवाद मिल्न सकेको छैन ।
संस्थापन र इतर समूहबीच कानुनी र राजनीतिक जटिलता कायमै छ ।
इतर समूह सर्वोच्च अदालतको पुनरावलोकन निवेदनपछि अधिवेशन रोक्नुपर्ने अडानमा छ भने संस्थापन पक्ष राजनीतिक सहमतिबाटै विवाद टुंग्याएर तोकिएकै समयमा अधिवेशन गर्नुपर्ने पक्षमा छ ।
महामन्त्री प्रदीप पौडेलले अदालत नभई आपसी सहमतिबाटै समस्या समाधान गर्नुपर्ने बताए ।
विशेष महाधिवेशनबाट बनेको वर्तमान नेतृत्व र पूर्वसभापति शेरबहादुर देउवाबीच आवश्यक संवाद हुन नसकेको देखिन्छ ।
नेता नैनसिंह महरले भने दुवै पक्षबीच संवाद गराएर मेलमिलाप गर्न सुझाएका छन् ।
उनले सभापति गगन थापा र पूर्वसभापति देउवाबीच वार्ताका लागि तीन विकल्प प्रस्ताव गरेका छन् ।
पूर्वसभापति देउवा निकट नेता एनपी साउदले भने १४औं महाधिवेशनलाई नै आधार मानेर देउवाकै नेतृत्वमा आगामी महाधिवेशन गर्नुपर्ने अडान राखेका छन् ।
प्रवक्ता देवराज चालिसेले आयोजक समितिभन्दा पनि सहमतिका लागि संयन्त्र बनाउन सकिने बताए ।
धेरै नेताका अनुसार अधिकांश कार्यकर्ता पार्टी एकताबद्ध भएको हेर्न चाहन्छन् ।
अहिलेको मुख्य चुनौती नेतृत्वको अहम् र अविश्वास कम गर्नु रहेको छ ।
