विश्व खबर 
काठमाडौं– १८ चैत २०६९ मा प्रहरीले गुह्येश्वरीबाट २ सय २६ केजी रक्तचन्दन बरामद गर्यो ।
बा १ ख ५७५९ नम्बरको मिनीट्रकमा बालुवाभित्र लुकाइएको सो चन्दन भक्तपुरतर्फ लगिँदै थियो ।
यो रक्तचन्दनका मालिक थिए, नवीनराज बस्नेत ।
प्रहरीले चालक भीमबहादुर सुनुवार र सहचालक खेमबहादुर सिंहलाई पक्राउ गर्यो, तर बस्नेत भने मोटरसाइकलमा गाडीको अघि–पछि गर्दै भाग्न सफल भए ।
त्यतिबेला काठमाडौं प्रहरी परिसरका प्रमुख थिए– राजेन्द्र श्रेष्ठ ।
नेकपा (एमाले) नेता महेश बस्नेतको पहुँच प्रयोग गरी नवीनराजलाई जोगाउने प्रयास भयो ।
उनी प्रहरी प्रमुख श्रेष्ठ कहाँ पुगे पनि जिल्ला वन कार्यालयले चालक र सहचालकविरुद्ध मात्र मुद्दा दायर गर्यो ।
९ वैशाख ०७० मा जिल्ला अदालतले उनीहरूलाई ६–६ महिना कैद र ३ लाख ६१ हजार ६ सय रुपैयाँ जरिवाना तथा गाडी जफतको फैसला गर्यो ।
तर, नवीन बस्नेतको ‘स्थायी ठेगाना नखुलेको’ भन्दै प्रहरीले उनलाई छुट दियो ।
अदालतले पनि ‘वास्तविक वतन खुलेमा मात्र कारबाही अघि बढ्ने’ भनी उनको मुद्दा तामेलीमा राख्यो ।
तर, प्रहरी र वन कार्यालय दुवैले उनको ठेगाना पत्ता लगाउने कुनै प्रयास गरेनन् ।
सहयोगीहरू जेल पर्दा, नवीनले महेश बस्नेतको राजनीतिक प्रभाव प्रयोग गरी उन्मुक्ति पाए ।
रक्तचन्दनबाट सुन तस्करीसम्मको यात्रा
प्रहरी स्रोतका अनुसार २०७४ भदौ १४ मा टोखाबाट १४ किलो सुन बरामद भयो ।
त्यो सुन पनि रक्तचन्दन तस्करकै समूहले ल्याएको थियो, जसमा नवीन बस्नेतको संलग्नता रहेको पुष्टि भए पनि उनलाई फेरि छुट दिइयो ।
त्यसपछि बस्नेत बिचौलियाको भूमिकामा सक्रिय भए ।
एमाले अध्यक्ष केपी शर्मा ओली प्रधानमन्त्री भएपछि उनले महेश बस्नेत र ओलीका स्वकीय सचिव राजेश बज्राचार्यको निकटता प्रयोग गरे ।
उनले भैरहवास्थित गौतम बुद्ध अन्तर्राष्ट्रिय विमानस्थलको ट्याक्सी–वे र एप्रोनको ठेक्का समेत लिएका थिए, जसमा उनी ‘क्षमादेवी’ कम्पनीमार्फत आबद्ध थिए ।
अख्तियार प्रमुखलाई धम्की र बस्नेतको भूमिका
पछिल्लो समय नवीन बस्नेतको कनेक्सन तत्कालीन क्यानका महानिर्देशक प्रदीप अधिकारीसँग पनि जोडियो ।
ह्वाट्सएप च्याटमा बस्नेतले अधिकारीलाई अख्तियारको मुद्दा ‘मिलाइदिने’ आश्वासन दिएको देखिन्छ ।
सोही क्रममा अख्तियार प्रमुख प्रेम राईलगायतलाई ज्यान मार्ने धम्की दिन २ करोड रुपैयाँको सुपारी दिइएको खुलेको छ ।
उक्त धम्कीपत्रको पीडीएफ बस्नेतकै मोबाइलबाट पठाइएको डिजिटल फरेन्सिक रिपोर्टले पुष्टि गरेको छ ।
तैपनि, प्रहरीले बस्नेतलाई सो मुद्दामा समेत कारबाही नगरी छुट दियो ।
एमाले नेता महेश बस्नेत र सञ्चार उद्यमी रामेश्वर थापाको प्रभावमा तत्कालीन प्रहरी प्रमुख रमेश थापालाई पारी मुद्दा रोकिएको स्रोतको दाबी छ ।
७ महिनामा ६ फोन, करोडौंको सम्पत्ति
अनुसन्धानले देखाएको छ, ७ महिनाको अवधिमा बस्नेतले ६ थान नयाँ आइफोन प्रयोग गरेका छन् ।
उनका नाममा आधा दर्जन कम्पनी तथा भक्तपुरको दुवाकोटमा मात्र ७२ रोपनी जग्गा रहेको स्रोत बताउँछ ।
उक्त जग्गा खरिदमा ओलीका स्वकीय सचिव राजेश बज्राचार्यको पनि लगानी रहेको दाबी गरिएको छ ।
अहिले ‘बेन’ को नाममा चलखेल
नवीन बस्नेतले पछिल्लो समय प्रधानमन्त्रीका मुख्य सल्लाहकार कुमार बेनसँगको ‘मिलेको’ दाबी गर्दै आफू निकटका व्यवसायी र पत्रकारहरूलाई चिन्ता नलिन आग्रह गरेका छन् ।
करिब एक साताअघि सिंहदरबार पूर्वी गेट नजिकको एउटा कार्यालयमा भएको भेटमा बस्नेतले भनेका थिए–
‘राजेश बज्राचार्य दाइ र मैले भेटेर कुमार बेनसँग कुरा मिलाएका छौं । बेनलाई ओली प्रधानमन्त्री हुँदा राजेश दाइले बालुवाटारमा काम दिनुभएको थियो । त्यही गुन फिर्ता गर्ने भनेका छन् बेनले ।’
यो अभिव्यक्तिले उनले पहिले महेश बस्नेत र अहिले कुमार बेनको नाम प्रयोग गरी प्रभाव विस्तार गर्न खोजेको संकेत गर्छ ।
प्रहरी भने उनकै गतिविधिमा केन्द्रित अनुसन्धान अघि बढाइरहेको जनाएको छ ।
