विश्व खबर 
काठमाडौं– नेकपा (एमाले) संसदीय दलका नेता रामबहादुर थापा ‘बादल’ले गत वर्षको जेनजी आन्दोलनका क्रममा लुटिएका हतियार नेपालका तिब्बती गुम्बाहरूमा लुकाइएको हुन सक्ने आशंका व्यक्त गरेका छन् ।
बुधबार प्रतिनिधिसभाको विशेष समयमा बोल्दै उनले केही अनुसन्धाताहरूले ती गुम्बाहरूमा ठूलो मात्रामा हतियार संकलन भइरहेको दाबी गरेको र लुटिएका हतियार पनि त्यहाँ राखिएको आशंका गरेको उल्लेख गरे ।
उनले नेपालले निर्वासित तिब्बतीहरूलाई मानवीय आधारमा मात्र शरण दिएको र उनीहरूलाई कहिल्यै राजनीतिक शरणार्थीको मान्यता नदिइएको स्पष्ट पारे ।
साथै, नेपालको भूमि अर्को खम्पा विद्रोह वा ‘दोस्रो युक्रेन’ बन्न नदिइने चेतावनी दिए ।
बादलले सरकारको विदेश नीति र राष्ट्रिय सुरक्षा रणनीतिमा खतरनाक विचलन आएको आरोप लगाउँदै भदौको विनाशकारी घटनामा टीओबी समूह अग्रपंक्तिमा रहेको र सो घटनाप्रति चीन सरकारले गम्भीर चासो व्यक्त गरेको पनि स्मरण गराए ।
राष्ट्रिय मानवअधिकार आयोगको प्रतिवेदन उद्धृत गर्दै उनले जेन्जी आन्दोलन लामो तयारीसहितको सुनियोजित विनाशकारी घटना भएको र त्यस्ता गतिविधिहरू अहिले पनि फरक रूपमा निरन्तर रहेको बताए ।
