विश्व खबर 
काठमाडौं– राष्ट्रिय स्वतन्त्र पार्टी (रास्वपा)ले आगामी स्थानीय तह निर्वाचनलाई लक्षित गरी ‘क्यान्डिडेट क्लब’ घोषणा गरेको छ ।
सोमबार पार्टी कार्यालयमा सभापति रवि लामिछानेले उक्त कार्यक्रमको शुभारम्भ गरेका हुन् ।
इच्छुक व्यक्तिहरूले अनलाइनमार्फत आवेदन दिन सक्नेछन् र योग्य, इमानदार तथा सक्षम उम्मेदवार छनोट गरिनेछ ।
रास्वपाको सङ्घीय सरकारमा ठूलो उपस्थिति भए पनि प्रदेश र स्थानीय तहमा प्रभाव छैन, त्यसैले आगामी ९ महिनामा हुने निर्वाचनलाई केन्द्रित गर्न पार्टी लागिपरेको हो ।
यता, नेपाली कांग्रेस विधान विवाद र महाधिवेशनको तयारीमा अल्झिएको छ भने नेकपा (एमाले) नेतृत्व परिवर्तनको माग तथा आन्तरिक असन्तुष्टिमा रुमल्लिएको छ ।
त्यस्तै, नेकपा (माओवादी–एकीकृत समाजवादी) पनि सत्ता समीकरण र नेतृत्व हस्तान्तरणकै विषयमा केन्द्रित देखिन्छ ।
राजनीतिक विश्लेषक डा.लोकराज बरालका अनुसार पुराना दलहरूको संगठन गाउँ–गाउँमा पुगिसकेकाले उनीहरू चुनावी तयारीमा हतार गर्दैनन्, तर रास्वपाले संगठन विस्तार गर्नै तीव्रता देखाएको हो ।
उनले आन्तरिक विवादले स्थानीय चुनावमा नकारात्मक प्रभाव पार्न सक्ने र नेताहरू समयअनुसार सचेत नभए किनारामा पर्ने चेतावनी पनि दिए ।
