विश्व खबर 
काठमाडौं– करिब पाँच महिनापछि स्वदेश फर्किन लागेका नेपाली कांग्रेसका पूर्वसभापति शेरबहादुर देउवाको भव्य स्वागतको तयारी गरिएको छ ।
राष्ट्रिय भेला आयोजक समितिका संयोजक डा.शशांक कोइरालाको नेतृत्वमा स्वागत कार्यक्रमको तयारी भइरहेको नेता मीन विश्वकर्माले जानकारी दिए ।
देउवा साउन २८ गते दिउँसो त्रिभुवन अन्तर्राष्ट्रिय विमानस्थलमा अवतरण गर्ने कार्यक्रम छ ।
आयोजक पक्षले देउवाको स्वागतमा करिब ५ देखि ७ हजार नेता–कार्यकर्ता सहभागी हुने अनुमान गरेको छ ।
यसबारे थप तयारीका लागि मंगलबार दिउँसो २ बजे आयोजक समितिको बैठक पनि बस्ने बताइएको छ ।
सिंगापुर उपचारका लागि फागुन १३ गते गएका देउवा राष्ट्रिय भेलाको पूर्वसन्ध्यामा काठमाडौं फर्किन लागेका हुन् ।
सर्वोच्च अदालतबाट आधिकारिकता विवादमा निस्सा पाएपछि देउवा–शशांक समूह उत्साहित बनेको छ ।
उता संस्थापन पक्ष भने महाधिवेशनको तयारीमा केन्द्रित छ ।
