विश्व खबर 
काठमाडौं– राष्ट्रिय परीक्षा बोर्डले माध्यमिक शिक्षा परीक्षा (एसईई)को नतिजा मंगलबारभित्र सार्वजनिक गर्ने तयारी गरेको छ ।
बोर्डकी सूचना अधिकारी लक्ष्मी मरासिनीका अनुसार सबै प्राविधिक र प्रशासनिक तयारी पूरा भइसकेको छ र कुनै समस्या नआए दुई दिनभित्र नतिजा प्रकाशित हुनेछ ।
यस वर्षको एसईई परीक्षा चैत दोस्रो सातादेखि सञ्चालन भएको थियो भने करिब एक महिनामै नतिजा सार्वजनिक गर्ने तयारी गरिएको हो ।
परीक्षामा कुल ५ लाख १२ हजार ४ सय २१ विद्यार्थी सहभागी भएका थिए ।
तीमध्ये ४ लाख ४१ हजार ५ सय ६६ नियमिततर्फ र ७० हजार ८ सय ५५ ग्रेड वृद्धितर्फका परीक्षार्थी थिए ।
लैंगिक तथ्याङ्कअनुसार २ लाख ५७ हजार ६ सय १३ छात्रा, २ लाख ५४ हजार ८ सय १ छात्र र अन्य ७ जना परीक्षामा सहभागी भएका थिए ।
यस वर्ष देशभरका ११ हजार ३ सय ७९ विद्यालयका विद्यार्थीले परीक्षा दिएका थिए ।
साथै, जापानको एक परीक्षा केन्द्रबाट २३ जना विद्यार्थी पनि सहभागी भएका थिए ।
उत्तरपुस्तिका जाँच यसपटक सम्बन्धित परीक्षा केन्द्रमै गरिएको थियो ।
