विश्व खबर 
तेहरान– इरानले आइतबार बिहान मध्यपूर्वमा नयाँ चरणको हवाई आक्रमण सुरु गरेको छ ।
विभिन्न देशका राजधानी र प्रमुख सहरमा विस्फोटको आवाज सुनिएको छ ।
तास्मिन न्यूजका अनुसार, इरानको इस्लामिक रिभोलुशनरी गार्ड कोर्प्स (आईआरजीसी)ले इजरायल र अमेरिकी अड्डामा छैटौँ चरणको मिसाइल तथा ड्रोन आक्रमण गरेको छ ।
इरायली सेनाले प्रहार भएका मिसाइलहरू पहिचान गरेको र रक्षात्मक प्रणाली सञ्चालनमा रहेको जनाएको छ ।
मध्य र दक्षिण इजरायलमा लगातार साइरन बजेका थिए ।
दुबईमा पनि बिहानभर विस्फोटको आवाज सुनिएको र आकाशमा धुवाँ देखिएको छ ।
जेबेल अली पोर्टमा ड्रोन अवरोधका भग्नावशेषले आगो लागेको छ ।
कतारको दोहामा बिहान ७ः३० बजे ठूलो विस्फोट भएको थियो, जसमा १६ जना घाइते भएका छन् ।
बहराइनको मनामा क्राउन प्लाजा होटल नजिक धुवाँ देखिएको र साइरन बजाइएको छ ।
इराकको एर्बिल विमानस्थलमा पनि कालो धुवाँ उठेको तस्बिरहरू बाहिरिएका छन् ।
यी घटनाले क्षेत्रीय तनाव बढाएको र सुरक्षा तथा राजनीतिक अवस्था जटिल हुने संकेत दिएको छ ।
