विश्व खबर 
काठमाडौं– युक्रेन र फ्रान्सले संयुक्त रूपमा हतियार उत्पादन सुरु गर्ने सहमति गरेका छन् ।
उक्त निर्णय किएभमा भएको रक्षा मन्त्रीहरूको भेटपछि सार्वजनिक गरिएको हो ।
फ्रान्स युक्रेनको प्रमुख सहयोगी राष्ट्रको रूपमा रहँदै आएको छ ।
रूसले करिब चार वर्षअघि आक्रमण सुरु गरेयता फ्रान्सले युक्रेनलाई सैन्य सहायता मात्र नभई राजनीतिक समर्थन पनि निरन्तर प्रदान गर्दै आएको छ ।
किएभमा भएको भेटपछि युक्रेनका रक्षामन्त्री मिखाइलो फेदोरोभले सामाजिक सञ्जालमा जानकारी दिँदै रक्षा उद्योगमा ‘ठूलो स्तरका संयुक्त परियोजना’ अघि बढाउने आशयपत्रमा दुवै देशबीच हस्ताक्षर भएको बताएका छन् ।
उनले भने, ‘अब हामी आपूर्ति मात्र होइन, संयुक्त उत्पादन र दीर्घकालीन समाधानतर्फ अघि बढ्दैछौँ, जसले हाम्रो रक्षा क्षमता व्यवस्थित रूपमा सुदृढ बनाउनेछ ।’
हालसम्म कुन हतियार उत्पादन गरिनेछ तथा कहिले उत्पादन सुरु हुनेछ भन्ने विषयमा विवरण खुलाइएको छैन ।
भेटका क्रममा युक्रेनलाई थप फ्रान्सेली हतियार र सैन्य उपकरण उपलब्ध गराउने विषयमा पनि छलफल भएको थियो ।
यसमा क्षेप्यास्त्र प्रणाली, लडाकु विमान र हवाई प्रतिरक्षा प्रणालीहरू समावेश रहेको बताइएको छ ।
फ्रान्सकी रक्षामन्त्री क्याथरिन भोट्रिनले आइतबार सामाजिक सञ्जालमा ‘फ्रान्स युक्रेनी जनताको साथमा छ र सधैं रहनेछ’ भन्ने प्रतिबद्धता व्यक्त गरेका छन् ।
फ्रान्सले गत वर्ष युक्रेनलाई दुई अर्ब युरो बराबरको सैन्य सहायता उपलब्ध गराउने घोषणा गरेको थियो ।
नोभेम्बरमा युक्रेनी राष्ट्रपति भोलोदिमिर जेलेन्स्की र फ्रान्सेली राष्ट्रपति इम्यानुएल माक्रोंबीच युक्रेनलाई अत्याधुनिक लडाकु विमान प्रदान गर्ने सम्भावनासम्बन्धी आशयपत्रमा पनि हस्ताक्षर भएको थियो ।
विशेषज्ञहरूको अनुसार, संयुक्त हतियार उत्पादनको सहमतिले युक्रेनको रक्षा उद्योगलाई मजबुत बनाउने र युरोपेली सुरक्षा सहकार्यलाई नयाँ चरणमा पुर्याउने अपेक्षा गरिएको छ ।
