विश्व खबर 
काठमाडौं– सरकारले किसानका लागि उपलब्ध गराएको अनुदानको मल अवैध रूपमा भण्डारण गरी कालोबजारी गर्ने धन्दामा संलग्न एक व्यक्तिलाई कपिलवस्तु प्रहरीले नियन्त्रण गरेको छ ।
नियन्त्रण हुनेमा कपिलवस्तु नगरपालिका– १०, पचेहरास्थित मनोज किराना पसलका सञ्चालक गोरखनाथ बनियाँ रहेका छन् । उनको पसलमा लुकाइछिपाई राखिएको १०२ बोरा अनुदानको मल पनि पहरीले बरामद गरेको छ ।
अवैध मल भण्डारण गरिएको भन्ने गोप्य सूचनाको आधारमा इलाका प्रहरी कार्यालय पकडी र जिल्ला प्रहरी कार्यालय कपिलवस्तुको संयुक्त टोलीले छापा मारेको थियो । १ लाख ३६ हजार चार सय रुपैयाँ मूल्यको ६२ बोरा डिएपी र ३० हजार दुई सय मूल्यको ४० बोरा युरिया गरी कुल एक लाख ६६ हजार ६ सय रुपैयाँको मलसहित सञ्चालक बनियाँलाई प्रहरीले नियन्त्रणमा लिएको छ ।
पछिल्लो समय कपिलवस्तु जिल्लामा अनुदानको मल अभाव सिर्जना गराई कालोबजारी र अवैध भण्डारणका घटना बढ्दै गएको भन्दै प्रहरीले निगरानी कडा पारेको थियो।
यस सम्बन्धमा जिल्ला प्रहरी कार्यालय कपिलवस्तुका अनुसार किसानलाई सहुलियतमा उपलब्ध गराइने अनुदानको मल लुकाएर राख्नु गम्भीर अपराध हो । यस्ता कार्यले कृषक मारमा पर्छन् । नियन्त्रणमा लिइएका व्यक्ति र बरामद मललाई आवश्यक कारबाहीका लागि राजस्व अनुसन्धान कार्यालय बुटवल पठाइएको छ ।
कपिलवस्तु प्रहरीका अनुसार अनुदानको मलको अवैध कारोबारमा संलग्न जो–कोहीलाई नछोड्ने चेतावनी दिँदै सर्वसाधारणलाई पनि यस्ता गतिविधिको सूचना दिन आग्रह गरेको छ ।
उक्त अनुदानको मल अर्घाखाँचीको मालारानी गाउँपालिका– ६ स्थित किसान कृषि सहकारी संस्था लिमिटेडले बेचेको प्रहरीको प्रारम्भिक अनुसन्धानबाट पत्ता लागेको छ ।
