विश्व खबर 
काठमाडौं– भिजिट भिसा प्रकरणमा मुद्दा दायर गर्ने अन्तिम तयारी अख्तियार दुरुपयोग अनुसन्धान आयोगले गरेको छ । सम्भवतः आजै, नभए केही दिनभित्रै मुद्दा दायरको तयारी छ ।
रोजगारीका लागि भिजिट भिसामा युवाहरूलाई विदेश पठाएर सेटिङमा अध्यागमन कर्मचारीहरूले दैनिक लाखौं रकम असुल गरेको उजुरीउपर करिब सात महिना लामो छानविन गरेर मुद्दा दायर गर्न लागेको हो । अभियोजनका अन्तिम तयारीमा अख्तियार रहेको बताइएको छ ।
अख्तियारका अनुसार विमानस्थल अध्यागमन कार्यालयका तत्कालीन प्रमुख तथा कर्मचारी र विभाग र मन्त्रालयका कर्मचारी लगायतविरुद्ध मुद्दा दायर गरिँदैछ ।
गत ७ जेठमा अख्तियारले विमानस्थलस्थित अध्यागमन कार्यालयमा छापा हानेर कार्यालय प्रमुख तीर्थराज भट्टराईसहित चारजनालाई नियन्त्रणमा लिएर अनुसन्धान थालेको थियो ।
भिजिट भिसामा खाडी देश जानेसँग अध्यागमनमा ५० हजारसम्म र युरोपियन देश जानेसँग तीन लाख रुपैयाँसम्म असुली हुने गरेको थियो । यसको लिंकेज अध्यागमन विभाग र गृह मन्त्रालयको उच्च तहसम्मै देखिएको थियो ।
