विश्व खबर 
काठमाडौँ – जेनजी आन्दोलनको अढाइ महिनापछि नेपाली कांग्रेसले भदौ २३ र २४ गतेका घटनाहरूमा दुख व्यक्त गर्दै फागुन २१ गतेका लागि निर्धारित आमनिर्वाचनमा सहभागी हुने निर्णय गरेको छ।
आफ्नै पार्टीका नेता गृहमन्त्री भएको आफूसमेत सहभागी सरकारका बेला भएको भदौ २३ को अत्याधिक बल प्रयोगप्रति कांग्रेसले अहिले आएर दुख व्यक्त गरेको हो। नेपाली कांग्रेससहितको गठबन्धन सरकारको नेतृत्वमा जेनजी प्रदर्शनकारीहरूमाथि अत्याधिक दमन हुँदा १९ जना युवाको ज्यान गुमेको थियो।
नेपाली कांग्रेसको लामो केन्द्रीय समिति बैठकले शनिबार पाँचबुँदे निर्णय गर्दै चुनावमा जाने औपचारिक निर्णय पनि गरेको छ। केपी ओली नेतृत्वको एमाले संसद पुनर्स्थापनाको देशव्यापी आन्दोलनमा उत्रेकै दिन नेपाली कांग्रेसले चुनावमा जाने निर्णय गरेर एमालेसँग औपचारिक रूपमै कित्ताकाट गरेको छ।
भदौ २३ गतेसम्म एमालेसँग टाँस्सिएरै बसेका कांग्रेस सभापति शेरबहादुर देउवा र उनी नेतृत्वको कांग्रेसले त्यो दिनको अत्याधिक बल प्रयोगपछि सरकार छाड्न कांग्रेस नेताहरूले नै दिएको सुझाव लत्याएका थिए। देउवाले एमालेसँग सत्ता गठबन्धनको बेला गरिएको सातबुँदे सहमतिको बहानामा त्यो बेला सरकारबाट बाहिरिन अस्वीकार गरेका थिए। देउवाले त्यो बहानाबाजी नगरेका भए सायद भदौ २४ गते त्यो तहको तोडफोड र आगजनीको परिस्थितिको निर्माण हुँदैन थियो भन्ने आकलन कतिपय राजनीतिक समीक्षकहरूको छ।
यद्यपि निर्वाचनमा जाने औपचारिक निर्णयसँग देउवाले बदलिएको स्पष्ट सन्देश दिएका छन् र एमालेसँग औपचारिक रूपमा कित्ताकाटको घोषणा गरेका छन्। कांग्रेसले यससँगै निर्वाचनका लागि वातावरण तयार गर्न सरकारसँग माग पनि गरेको छ।
ओलीले भने निर्वाचन आयोगमा फागुन २१ को निर्वाचनका लागि पार्टी दर्ता गराए पनि औपचारिक रूपमा संसद् पुनर्स्थापनाको देशव्यापी आन्दोलन सुरु गरेका छन्।
कांग्रेसले जेनजी प्रदर्शन मार्फत् परिवर्तनका लागि मुखरित आवाजको संवोधन गर्न बहुपक्षीय राष्ट्रिय संवाद अत्यावश्यक छ भन्ने ठहर गर्दै सुशासन र पारदर्शिता लगायतका विषयमा सबै पक्षसँग संवाद गरी सहमति कायम गर्दै, संविधानको मर्म र मूल्य मान्यता बमोजिम रूपान्तरण सहित देशलाई शान्ति, समुन्नति र स्थिरताको दिशातर्फ अघि बढाउन साझा समझदारी आवश्यक रहेको निष्कर्ष पनि निकालेको छ।
