काठमाडौं– नेकपा (माओवादी केन्द्र) र एकीकृत समाजवादीसहित १२ वाम घटक मिलेर गठन भएको नेपाली कम्युनिस्ट पार्टी (नेकपा) विरुद्ध निर्वाचन आयोगमा उजुरी परेको छ ।
नेपाल कम्युनिस्ट पार्टीका अध्यक्ष लोकनारायण सुवेदीले कात्तिक २६ गते प्रचण्ड नेतृत्वको ‘नेकपा’ विरुद्ध उजुरी दिएका हुन् ।
उजुरीमा सुवेदीले आफ्नो दलसँग मिल्दोजुल्दो नामले भ्रम सिर्जना हुन सक्ने भन्दै दर्ता नगर्न आयोगसँग अनुरोध गरेका छन् ।
यसअघि २०७५ मा तत्कालीन नेकपा (एमाले) र माओवादी केन्द्र मिलेर नेकपा गठन गरिएको थियो ।
तर, त्यसलाई २०७७ मा सर्वोच्चले बदर गरेको थियो ।
यसपटक प्रचण्डले ‘नेपाली कम्युनिस्ट पार्टी’ नाममा दल दर्ता गराएका छन् ।
दुवै दलको नाममा ‘नेपाली’ र ‘नेपाल’ मात्र फरक छ, छोटकरीमा दुवै ‘नेकपा’ उच्चारण हुन्छ ।
नेकपाको इतिहास अनुसार पुष्पलाल श्रेष्ठले २००६ साल वैशाख १० गते पार्टी स्थापना गरेका थिए ।
त्यसपछि अनेकौं महाधिवेशन, विभाजन र पुनर्गठन भए ।
पुष्पलालका असली अनुयायी सुवेदीले २०६९ सालमा निर्वाचन आयोगमा नेकपा दर्ता गरेका थिए ।
हाल नेपालको वामपन्थी दलहरू आफ्नो पार्टीलाई पुष्पलालको वास्तविक उत्तराधिकारी दाबी गर्दै आएका छन् ।
निर्वाचन आयोगले दल दर्ता निर्णय गरेपछि सम्भावित विवाद सर्वोच्च अदालतमा पुग्न सक्ने देखिन्छ ।























