विश्व खबर 
काठमाडौं– लामो समय संसदीय राजनीति बाहिर रहेर वैकल्पिक राजनीतिक गतिविधि गर्दै आएका नेकपा (विप्लव समूह) का महासचिव नेत्र विक्रम चन्द ‘विप्लव’ संसदीय मार्गमा प्रवेश गर्ने तयारीमा छन् ।
उनले ‘कम्युनिस्ट पार्टी नेपाल’ नाममा दल दर्ताका लागि मंगलबार निर्वाचन आयोगमा निवेदन दिएका छन् ।
पार्टीका प्रवक्ता खड्गबहादुर विश्वकर्माका अनुसार आगामी फागुन २१ गते हुने निर्वाचनमा सहभागी हुने उद्देश्यले दल दर्ता गराइएको हो ।
उनले जनताको अधिकार र निर्णयको माध्यम लोकतान्त्रिक निर्वाचन भएकाले पार्टीले त्यसमा भाग लिन लागेको बताए ।
जेनजी आन्दोलनपछि बनेको सरकारले ठूला चुनौतीहरूको सामना गरिरहेको उल्लेख गर्दै विश्वकर्माले वर्तमान परिस्थितिमा नयाँ राजनीतिक समझदारी आवश्यक भएको बताए ।
दल दर्ता निवेदन बुझ्दै आयोगका कार्यवाहक प्रमुख निर्वाचन आयुक्त रामप्रसाद भण्डारीले कानूनभित्र रहेर जनताको विश्वास जित्न आएका दललाई आयोगले स्वागत गर्ने बताए ।
विप्लव नेतृत्वको समूहले यसअघि ‘नेपाल कम्युनिस्ट पार्टी (नेकपा)’ नाममा राजनीतिक गतिविधि गर्दै आएको भए पनि यसपालि निर्वाचन प्रयोजनका लागि ‘कम्युनिस्ट पार्टी नेपाल’ नाम प्रस्ताव गरिएको हो ।
आयोगले निवेदन अध्ययन गरी आवश्यक निर्णय लिने जनाएको छ ।
विप्लव तत्कालीन १० वर्षे माओवादी सशस्त्र संघर्षमा संलग्न थिए ।
त्यसपछि माओवादी शान्तिवार्तामा आयो र त्यसपछि नेकपा नामक समूहमार्फत उनले केही समय उदण्ड मच्चाए ।
अन्ततः विप्लव शान्तिवार्ता आएसँगै गाउँघरमा खेतीपाती गर्दै आएका छन् भने आज उनले दल दर्ता गरेका छन् ।
योसँगै उनको संसदीय राजनीतिको यात्रा तय भएको छ ।
प्रतिक्रिया दिनुहोस्