काठमाडौं – प्रतिनिधिसभामा भिजिट भिसा प्रकरणका कारण उत्पन्न गतिरोध अन्त्य गर्न नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’बीच उच्चस्तरीय छलफल हुने भएको छ।
त्रिभुवन अन्तर्राष्ट्रिय विमानस्थलको अध्यागमन कार्यालयसँग जोडिएको भिजिट भिसा दुरुपयोगको विषयले संसद् अवरुद्ध भइरहँदा सो विषयमा साझा समझदारी खोज्ने प्रयासस्वरूप प्रचण्डले देउवासँग संवाद गर्ने तयारी गरेका हुन्।
प्रतिनिधिसभामा जारी अवरोधका सन्दर्भमा शुक्रबार संसद् भवन नयाँ बानेश्वरमा बसेको प्रमुख प्रतिपक्षीहरूको बैठकले कांग्रेस सभापति देउवासँग छलफल गर्न प्रचण्डलाई जिम्मा दिने निर्णय गरेको थियो।
यसै सन्दर्भमा आज बिहान प्रचण्डले कांग्रेस उपसभापति पूर्णबहादुर खड्का, नेता ज्ञानेन्द्रबहादुर कार्की र प्रमुख सचेतक श्यामकुमार घिमिरेसँग समेत परामर्श गरेका थिए। बैठकपछि सञ्चारकर्मीहरूसँग बोल्दै उनले संसद् अवरुद्ध भएको अवस्थाको समाधानका लागि देउवासँग औपचारिक छलफल गर्ने बताएका थिए।
कांग्रेस नेता ज्ञानेन्द्रबहादुर कार्कीले पनि प्रचण्ड र देउवाबीच छलफल चाँडै हुने पुष्टि गरेका छन्। यद्यपि, छलफलको समय भने अहिलेसम्म टुंगो लागिसकेको छैन।
सत्तारुढ दल र विपक्षी दलबीच सहमतिको प्रयास चलिरहेकाले प्रतिनिधिसभाको बैठक आइतबार दिउँसो १ बजेसम्मका लागि सूचना जारी गर्दै स्थगित गरिएको छ। विपक्षी दलहरूले गृह मन्त्रालयमा भिजिट भिसा प्रकरणको जिम्मेवारी लिँदै गृहमन्त्री रमेश लेखकको राजीनामा, संसदीय छानबिन समिति वा न्यायिक आयोग गठनको माग गरिरहेका छन्।






















