विश्व खबर 
काठमाडौं-मंगलबार मध्यान्ह बागमती होटलको कोठा नम्बर ३०८ मा दुई जना युवायूवतीहरुले लिएको होटलको कोठाको ढोकामा बाहिरबाट ताला लागेको हुन्छ । सम्पर्क नम्बरमा फोन गर्दा फोन लाग्दैन र हतार हतारमा होटलको साहुले प्रहरी र वडा कार्यालयमा खवर गरेर ताला फुटाएर हेर्दा एक युवती बेडमै मृत अबस्थामा भटिन्छ ।
प्रहरीले होटलमा मृत फेला परेकी सुस्मिता खड्का कलेजसँगै जापनिज भाषा पनि पढिरहेकी थाहा पाउँछ र कागेश्वरी मनोहरा नगरपालिकास्थित आलापोट घर भएकी उनी युवती नयाँ वर्षको अघिल्लो दिन उक्त होटलमा बस्न गएको रेर्कड भेटिन्छ । एक युवकसँगै होटलमा पुगेकी ती युवती भोलिपल्ट बुधबार मृत भेटिएकी हुन् । सुस्मिताको हत्या भएको प्रहरीको प्रारम्भिक अनुसन्धान निष्कर्ष छ । उनीसँगै होटलमा गएका युवक फरार छन् । पुस १६ मा मध्यान्ह उनीसँगै होटलमा गएका युवक फरार छन् ।
होटलमा सुस्मिताको हत्या गरिएको अनुसन्धान अधिकृतहरूले आशंका गरेका छन् । युवक होटलको ढोकामा ताला लगाएर फरार भएको भेटिएको छ । घटनामा संलग्न एक प्रहरी अनुसन्धान अधिकृत भन्छन्, ‘बाहिरबाट ढोक लक गरेर चाबी लिएर आरोपी भागेको देखिन्छ ।’
मृत फेला परेकी युवतीको कोठामा रेडबुलको बट्टा भेटिनु र अन्य कुनै खानेकुराहरू नभेटिएकाले घटनाको प्रकृति हेर्दा ती युवतीले रेडबुल पिएको जस्तो देखिएको प्रहरी अधिकारीहरू बताउँछन् । शरीरमा कतै पनि घाउ चोट नलागेको अवस्थामा युवतीको शव बुधबार भेटिएको थियो । घटनास्थल मुचुल्का गर्ने क्रममा युवतीको मुखबाट फिज निस्किएजस्तो पदार्थ देखिएको प्रहरी अधिकारीको भनाइ छ ।
‘कतै घाउचोट पनि नहुनु । बेडमै मृत भेटिनु र मुखबाट फिँजजस्तो पदार्थ देखिएकाले रेडबुलमा मिसाएर कुनै नसालु पदार्थ सेवन गरे÷गराएर हत्या भएको हो कि भन्ने आशंका गरेका छौं,’ उनले भन्छन्, ‘यद्यपि पोस्टमार्टम रिपोर्ट आउन बाँकी नै रहेकाले मृत्युको कारण यकिन हुन बाँकी नै छ ।’
उनी खुट्टामा जुत्ता लगाएकै अवस्थामा मृत भेटिएकी थिइन् । जसकारण युवती कोठाबाट बाहिर निस्कन लागेपछि उनी सँगै होटलमा आएका युवकले बाहिरबाट ताला लगाएर फरार भएको हुनसक्ने आशंका प्रहरीको छ । ‘खुट्टामा जुत्ता लगाएकै अवस्थामा मृत भेटिएकाले उनी कोठाबाट बाहिरिने तरखरमा थिइन् कि भन्ने बुझ्न सकिन्छ । अब संदिग्ध व्यक्ति पक्राउ परेपछि मात्रै थप कुराहरू खुल्ला’ एक अनुसन्धान अधिकृतले भने ।
मंगलबार कोठामा बस्न आएका युवायुवती बाहिरबाट ढोकामा ताला लगाएर सम्पर्कविहीन भएको भन्दै बिहीबार होटल सञ्चालकले प्रहरीलाई खबर गरेका थिए । त्यसपछि स्थानीय जनप्रतिनिधिसहितको उपस्थितिमा बुधबार दिउँसो ताला फुटाएर हेर्दा युवतीको शव भेटिएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले बताए ।
युवती मृत भेटिएपछि प्रहरी वृत्त गौशाला, जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयको टोलीले अनुसन्धान अघि बढाएको थियो । अनुसन्धानको क्रममा युतवीसँगै होटलमा बस्न आएका ती युवकले मृत युवतीको मोबाइल समेत लिएर गएको खुलेको छ । ‘कोठाको बाहिरबाट ताला लगाएर युवतीको मोबाइल लिएर ती युवक फरार भएको देखिन्छ । युवकको हामीले पहिचान गरिसकेका छौं,’ प्रहरी स्रोतले भन्यो । फरार युवकको पहिचान भइसकेको र पक्राउ गर्न मात्रै बाँकी रहेको प्रहरीले जनाएको छ ।
ति युवक जापानबाट मंसिर ३० मा नेपालमा आएको पत्ता लागेको छ । ३ वर्षदेखि जापानमा बसेका ती युवक छुट्टीमा काठमाडौं आएका थिए । (विहिबार) आज जापान जाने तयारीमा गरेका थिए ।सुस्मिता ती युवकसँग प्रेम सम्बन्धमा थिइन् । घटनाबारे उपत्यका अपराध अनुसन्धान कार्यालय र जिल्ला प्रहरी परिसर काठमाडौंले अनुसन्धान गरिरहेको छ ।
प्रतिक्रिया दिनुहोस्