विश्व खबर 
काठमाडौं – सहकारीको रकम अपचलन गरेको आरोपमा पक्राउ परेका रास्वपा सभापति रवि लामिछाने ४० दिनपछि काठमाडौं आइपुगेका छन् ।
लामिछानेलाई प्रहरीले कात्तिक २ गते पक्राउ गरी सोही दिन पोखरा लगेको थियो । त्यसयता लामिछाने ४० दिनसम्म पोखरा र रुपन्देहीको प्रहरी हिरासतमा बसेका थिए ।
बिहीबार भने काठमाडौंको स्वर्णलक्ष्मी सहकारीको रकम अपचलनको विषयमा बयानका लागि लामिछानेलाई पोखराबाट काठमाडौं ल्याइएको हो ।
लामिछानेलाई काठमाडौंमा जिल्ला सरकारी वकिलको कार्यालयमा बयानका लागि उपस्थित गराइने छ । आज भने लामिछानेलाई त्रिभुवन अन्तर्राष्ट्रिय विमानस्थलको आन्तरिक टर्मिनलबाट सोझै जिल्ला प्रहरी कार्यालय परिसर भद्रकाली ल्याइएको छ ।
सुरक्षालाई मध्यनजर राख्दै भद्रकाली क्षेत्र वरपर बाक्लो संख्यामा सुरक्षाकर्मी परिचालन गरिएको छ । उनीमाथि सहकारी ठगी, संगठित अपराध एवं सम्पत्ति शुद्धीकरण सम्बन्धी मुद्दामा अनुसन्धान भइरहेको छ ।
अनुसन्धानका लागि कात्तिक २ गते काठमाडौंबाट पक्राउ परे यता उनलाई ५ पटक म्याद थप गरिसकिएको छ । लामिछानेलाई पछिल्लोपटक मंसिरमा ९ गते १५ दिन म्याद थप गरिएको छ ।
पोखरा हिरासतबाटै रविलाई रुपन्देही, काठमाडौं र चितवन जिल्ला अदालतमा बयानका लागि लगिने छ ।
प्रतिक्रिया दिनुहोस्