विश्व खबर 
काठमाडौं-आफैँले शरीरमा पेट्रोल छर्केर आगो लगाएपछि सिकिस्त घाइते नुवाकोटकी २७ वर्षीया पुष्पा न्यौपानेको मृत्यु भएको छ ।
काठमाडौं महानगर-१० बानेश्वर बस्ने पुष्पा आइतबार साँझ सवा ७ बजे काठमाडौं महानगरपालिका-४ धुम्बराहीस्थित एउटा घरअगाडि गएकी थिइन्। उक्त घरका युवकसँग उनको गत भदौमा इन्गेजमेन्ट भएको थियो। तर केटाको परिवारले कारणसमेत नबताई एक्कासी इन्गेजमेन्ट टुटाएको मृतकका आफन्तको भनाइ छ। त्यसपछि आइतबार साँझ पुष्पालाई केटाको परिवारले सामान लिन बोलाएको मृतकका काका उत्तम न्यौपानेले बताए। उनले आइतबार साँझ धुम्बाराही पीपलबोट नजिक आफूलाई आगो लगाएकी थिइन् । उनी भने काठमाडौं बुद्धनगरमा बस्दै आएकी थिइन् ।
विवाहका लागि भएको इन्गेजमेन्ट तोडिएपछि उनले केटाको घरनजिकै आफैँलाई आगो लगाएकी थिइन् । उनको उपचारका क्रममा कीर्तिपुर बर्न अस्पतालमा सोमबार मृत्यु भएको हो ।घटनालगत्तै गम्भीर घाइते उनलाई त्रिवि शिक्षण अस्पताल महाराजगन्ज लगिएको थियो । त्यहाँबाट थप उपचारका लागि कीर्तिपुर लगिएको थियो ।धुम्बाराहीका सुदन संग्रौलासँग उनको विवाहका लागि गत १८ भदौमा टिकाटालो भएको थियो ।
इन्गेजमेन्टअघिसम्म घुमाउन लैजाने, परिवारसँग बसेर रमाइलो गर्ने, एकअर्काप्रति माया गर्ने सुदनले त्यसपछि भने पुष्पालाई पटक पटक मानसिक यातना दिएको र त्यसैको पीडाले मर्न माध्य पारेको पीडित परिवारको आरोप छ ।
‘उनीहरूले बारम्बार फोन गरेर सामान लिन बोलाएपछि पुष्पा त्यहाँ पुगेकी थिइन्। उनीहरूको घरअगाडि नै हाम्री छोरी जलिन्,’ उनले भने, ‘२० मिनेटसम्म पनि उनी जलिरहिन्। तर उनीहरूले बचाएनन्।’
पुष्पाले आफैंमाथि पेट्रोल छर्केर आत्मदाहको प्रयास गरेको प्रहरीले बताएको छ। यद्यपि केटा पक्षको परिवारले जलेको देख्दा पनि उद्धार नगरेको हुँदा आत्महत्या नभएको उत्तम बताउँछन्।पुष्पाका परिवारले इन्गेजमेन्ट तोड्ने केटासहित उनको परिवारका चार जनाविरूद्ध आत्महत्या दुरूत्साहनमा जाहेरी दिएको थियो।
मृतकका काका उत्तम न्यौपानेका अनुसार प्रहरीले चारै जनालाई सुरूमा हिरासतमा लिएको थियो। तर पछि केटालाई मात्र काठमाडौं जिल्ला अदालतबाट पाँच दिन हिरासतमा राख्न म्याद थप गरी अन्यलाई छाडेको छ।पुष्पा दरबारमार्गस्थित केल्मी नेपालको शोरूममा काम गर्थिन्। उनीसँग इन्गेजमेन्ट गर्ने केटाको न्युरोडमा पसल छ। कोरोना महामारीअघि उनी चीनमा बस्थे। दरबारमार्गमा रहेको केल्मी नेपालको शो रूममा जाँदा पुष्पासँग उनको चिनजान भएको थियो। पुष्पाको फेसबुक विवरण मागेर उनले चिनजान अघि बढाएका थिए।
‘पुष्पा काम गर्ने शो रूममा आउँदा चिनेका रहेछन्। फेसबुकको डिटेल्स लिएर उनीहरूबीच कुराकानी अघि बढेको थियो,’ काका उत्तमले भने, ‘पुष्पाले विवाह नै गरौं। माग्न आऊ भनेपछि हामीले पनि सहमति जनाएका थियौं।’
केटालाई आफूले पनि चिनेको हुँदा उनीहरूको विवाहमा राजी भएको उनले बताए। अहिले के कारणले इन्गेजमेन्ट तोडेको जानकारी नै नदिएको उत्तम बताउँछन्। ‘हामीले कारण सोध्दा पनि पुष्पालाई थाहा छ भने। केही कारण नै नबताई सम्बन्ध तोडे,’ उनले भने, ‘हामीले बुझ्दा केटाको अर्कैसँग अफेयर भएकाले त्यस्तो गरेका हुन् रे।’
उनीहरूबीच इन्गेजमेन्ट भएपनि कहिले विवाह गर्ने भन्ने टुंगो लागिसकेको थिएन। घटनापछि प्रहरीले हत्या आशंकामा सुदनलाई पक्राउ गरेको छ ।महाराजगन्जका डीएसपी अंगुर जीसीले पक्राउ परेका सुदनविरुद्ध आत्महत्या दुरुत्साहनको कसुरमा अनुसन्धान अघि बढाइएको जानकारी दिए ।पुष्पाको सोमबार नै दाहसंस्कार गरिएको छ ।
