विश्व खबर 
काठमाडौं – सर्वोत्तम पेन्ट्स इण्डष्ट्रिज लिमिटेडले गत आर्थिक वर्षको मुनाफाबाट शेयरधनीलाई वितरण गर्न प्रस्ताव गरेको लाभांश पारित गर्न पाँचौँ वार्षिक साधारण सभा बोलाएको छ ।
कम्पनीले असोज २५ गते आइतबार कैलालीको गोदावरीस्थित होटल जंगल स्पा प्रालिमा साधारण सभा आयोजना गर्ने भएको हो । सभा दिउँसो १ बजे सुरु हुनेछ ।
सभामा कम्पनीले हाल कायम चुक्ता पूँजीको १० प्रतिशत बोनस शेयर र बोनस शेयरमा लाग्ने कर प्रयोजनका लागि शून्य दशमलव ५२६३ प्रतिशत नगद लाभांश वितरण गर्ने प्रस्ताव पेस गर्नेछ ।
त्यस्तै, सभामा कम्पनीको प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्ताव पनि पेस हुनेछ ।
कम्पनीले संस्थापक समूहबाट तीन जना र सर्वसाधारण समूहबाट एक जना सञ्चालक निर्वाचित गर्ने प्रस्तावसमेत सभामा लैजाने भएको छ ।
असोज १३ गते बुक क्लोज
साधारण सभा तथा लाभांश वितरण प्रयोजनका लागि कम्पनीले असोज १३ गते मंगलबार एक दिनका लागि शेयर दाखिला खारेज गर्ने भएको छ ।
यसअनुसार असोज १२ गतेसम्म नेपाल स्टक एक्सचेन्जमा कारोबार भई कायम रहेका शेयरधनीहरूले साधारण सभामा सहभागी हुन तथा प्रस्तावित लाभांश प्राप्त गर्न सक्नेछन् ।
सभाबाट लाभांश प्रस्ताव पारित भएपछि योग्य शेयरधनीलाई नियमानुसार बोनस शेयर तथा नगद लाभांश वितरण गरिनेछ ।
