काठमाडौं– सहकारी ठगी र सङ्गठित अपराध अभियोगमा थुनामा रहेका राष्ट्रिय स्वतन्त्र पार्टीका सभापति रवि लामिछाने र गोर्खा मिडियाका तत्कालीन सञ्चालक छविलाल जोशीको मुद्दा उच्च अदालत तुलसीपुर बुटवलमा सुनुवाइ हुने भएको छ ।
न्यायाधीशद्वय बासुदेव आचार्य र ओमप्रकाश अर्यालको संयुक्त इजलासमा दुवैको मुद्दा हेर्न पेशी तोकिएको हो ।
सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले आफ्नो भागको बिगो रकम बुझाए पनि जिल्ला अदालत रुपन्देहीले गत साउन २६ गते जमानत अस्वीकार गरेको थियो ।
उक्त आदेशविरुद्ध उनले भदौ ९ गते उच्च अदालतमा निवेदन दर्ता गराएका थिए ।
सुप्रिम सहकारी प्रकरणमा रविसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरिएको छ ।
लामिछाने र जोशी दुवै जनाले आफ्नो भाग बराबर २ करोड ७४ लाख ८४ हजार रुपैयाँको बैंक जमानत पेस गरेका थिए ।
तर, उनीहरूको भागमा कति बिगो पर्छ भन्ने यकिन नहुँदा अदालतले दुवैलाई रिहा गर्न अस्वीकार गरेको हो ।
हाल लामिछाने नख्खु कारागारमा छन् भने जोशी भैरहवा कारागारमै रहेका छन् ।























