विश्व खबर 
काठमाडौं– सुदूरपश्चिम प्रदेशका मुख्यमन्त्री कमलबहादुर शाहले नागरिक उन्मुक्ति पार्टी (नाउपा)का उद्योग, पर्यटन, वन तथा वातावरण मन्त्री रामेश्वर चौधरीलाई बिहीबार बर्खास्त गरेका छन् ।
खप्तड क्षेत्र पर्यटन विकास समितिमा एकलौटी नियुक्ति गरेका चौधरीलाई मुख्यमन्त्रीले राजीनामा दिन भनेका थिए । तर, चौधरीले गल्ती नगरेको भन्दै राजीनामा अस्वीकार गर्दै बर्खास्त गर्न चुनौती दिएका थिए ।
पार्टी संरक्षक रेशम चौधरीको समर्थनमा अडिग रहेका मन्त्री चौधरीलाई बर्खास्त गरेपछि नाउपाले शुक्रबार सरकारलाई दिएको समर्थन फिर्ता लिने निर्णय गरेको छ ।
समर्थन फिर्ता लिएसँगै मुख्यमन्त्री शाहले दुईतिहाइ बहुमत गुमाएका छन् । तर, कांग्रेस र एमालेको समर्थनका कारण बहुमत कायमै छ ।
मुख्यमन्त्री शाहले भने नाउपालाई सरकारबाट हटाउने मनसाय नभएको र फेरि पनि उनीहरू सरकारमा सहभागी हुनेमा आफू विश्वस्त रहेको बताए ।
नाउपा अध्यक्ष रञ्जिता श्रेष्ठले भने मुख्यमन्त्री शाहको अर्घेल्याइँले आफ्नो पार्टीको मन्त्रीलाई बिना कारण बर्खास्त गरेको आरोप लगाएकी छन् ।
नाउपा सरकारबाट बाहिरिसँगै विपक्षी नेकपा (माओवादी केन्द्र)ले सरकारमा जाने वा नजाने भन्नेबारे केन्द्रसँग छलफलका लागि सर्कलर गर्ने स्रोतले बताएको छ ।
प्रतिक्रिया दिनुहोस्